Хитой самарқандлик сохта «пайғамбар»га раддия берди, Мусулмонлар идораси эса унга ишонганлар кофир бўлишини эслатди

Аввалроқ, ижтимоий тармоқларда самарқандлик кишининг «мен Аллоҳнинг элчисиман, коронавирус вабосининг йўқолиши менга боғлиқ, Хитойдаги ўлим масканига бориб келишим керак», деган видеолари тарқалган эди.

Самарқанд вилоят ИИБ ахборот хизмати ушбу фуқаро 1962 йилда Самарқанд туманида туғилган Х.У. бўлиб, у 1980—1982 йилларда Афғонистондаги фуқаролик урушида ҳарбий хизматни ўтагани ва хизмати давомида бош қисмидан жароҳат олган фуқаро бош мия контузияси касаллиги билан даволанганини маълум қилди.

Шунингдек, ҳозирда унинг психологик ҳолатини аниқлаш мақсадида Самарқанд вилоят Руҳий касалликлар диспансери мутахассиси кўригидан ўтказиш чоралари кўрилмоқда.

Хитойнинг Ўзбекистондаги элчихонаси “COVID-19 ватани – Хитойга бориб инсониятни коронавирусдан қутқариш учун юборилган самарқандлик шахсга мурожаат қилди. Хитойликларнинг мазкур шахсга жавоб қайтаришига унинг Хитойни «коронавирус ватани» дегани сабаб бўлган.

Дипломатлар хушмуомалалик билан унга Хитой вируснинг «ватани» эмас, балки коронавирус эпидемияси ҳақида биринчи бўлиб хабар берганини эслатди.

“Биз пандемияни енгиш учун бутун инсониятнинг билими ва кучини бирлаштириш ва барча ресурсларни сафарбар қилиш керак, деб ўйлаймиз. Бироқ, биз шуни ёдда тутишимиз керакки, Хитой бу инқирозни биринчи бўлиб аниқлаб берган ва асло вируснинг «ватан»и эмас. Бундан ташқари, тобора кўпроқ илмий тадқиқотлар шуни кўрсатадики, коронавируснинг янги тури Хитойда тарқалишидан анча олдин бошқа жойларда пайдо бўлган ва унинг келиб чиқиши аниқ эмас”, - дейилади элчихона хабарида.

Уларнинг фикрига кўра, COVID-19 Уханда авж олишидан олдин ҳам бўлган, аммо ҳаракатсиз эди.

Шунингдек, Ўзбекистон мусулмонлар идораси ҳам бу каби даъволарни кескин қоралаб чиқди.

"Аввало таъкидлаймизки, илму маърифат ривожланган бугунги даврда кишиларнинг вақтларини олиб, шундай лавҳаларни тарқатиш ҳеч бир мантиққа тўғри келмайди. Бундай хабарларнинг кенг аудиторияга эга бўлган ижтимоий тармоқ юритувчилари ҳам тарқатаётгани жуда ҳам ташвишли ҳолатдир.

Ўз навбатида бу лавҳани ҳар қандай мақсадда тарқатмасликни қатъий таъкидлаймиз. Бизнинг вазифамиз ўлароқ, бу сохта даъвога раддия ёздик.

Ҳазрати Пайғамбаримиз Муҳаммад соллаллоҳу алайҳи васаллам расул (элчи) ва набийларнинг сўнггисидирлар. Аллоҳ таоло: «Муҳаммад сизлардан бирон эркакнинг отаси бўлган эмас. Лекин Аллоҳнинг Расули ва Набийларнинг сўнггисидир. Аллоҳ ҳар бир нарсани ўта билгувчидир», дея хитоб қилган («Аҳзоб» сураси, 40-оят).

Ушбу оятга кўра, кимда-ким Муҳаммад соллаллоҳу алайҳи васалламдан кейин яна пайғамбар ё расул чиқади деб айтса, эътиқод қилса, кофир бўлади. Чунки у мазкур оятни инкор қилган ва Муҳаммад соллаллоҳу алайҳи васалламнинг энг сўнгги пайғамбар ва расул эканини тан олмаган бўлади.

Савбон розияллоҳу анҳудан ривоят қилинади, Набий соллаллоҳу алайҳи вассаллам: «...Келажакда умматимда ўттизта каззоб бўлур. Уларнинг ҳар бири ўзининг набийлигини даъво қилур. Ҳолбуки, мен набийларнинг хотими-тугатувчисиман. Мендан кейин набий келмас», дедилар” (Имом Термизий ва Абу Довуд ривоятлари). «Каззоб» сўзи арабча сўз бўлиб, «кўп ёлғон гапирувчи», «ўта кетган ёлғончи» маъноларини ифода этади.

Демак, Набий алайҳиссаломдан кейин ҳеч қандай пайғамбар ёки расул чиқиши мумкин эмас. Бордию, кимдир пайғамбарлик ё расулликни даъво қилса, у ёлғончи дея инкор этилади ва унга қарши чиқилади. Саҳобаи киромлар Расулуллоҳ соллаллоҳу алайҳи васалламдан кейин пайғамбарлик даъвоси билан чиққан Мусайлама, Асвад Анасий ва Сажоҳ каби сохта пайғамбарларга қарши қаттиқ жанг қилганлар.

Бошқа бир ҳадиси шарифда шундай дейилади:

«Менинг ва анбиёларнинг мисоли, худди биноси гўзал бир қасрга ўхшайди. Унда бир ғишт ўрни тарк қилингандир. Бас, назар солувчилар уни айланиб кўриб, биносининг гўзаллигидан ажабланадилар. Фақат ҳалиги ғишт ўрнидан бошқа айб топа олмайдилар. Бас, мен ўша ғиштнинг ўрнини тўлғаздим. Мен билан бино хотимасига етди. Пайғамбарлар охирига етдилар» (Имом Бухорий ва Имом Муслим ривоятлари).

Яна бир ҳадиси шарифда бундай дейилган:

«Бошқа анбиёлардан олти нарса ила афзал қилиндим: 1. Менга жамловчи калом берилди. 2. Менга душманимга қўрқинч солиш ила нусрат берилди. 3. Менга ўлжалар ҳалол қилинди. 4. Менга ер покловчи ва масжид қилинди. 5. Мен ҳамма халойиққа юборилдим. 6. Мен билан набийлар тугатилди» (Имом Муслим ва Имом Термизий ривоятлари).

Яна бир муҳим жиҳат, ушбу руҳий носоғлом кимса ғайбни даъво қиляпти. Тарқалган вирус одамларнинг қилган гуноҳига келди, деб ишонч билан айтмоқда. Ғайбни фақат Аллоҳ билади, уни биламан дейишнинг ўзи ҳам куфрдир. Қуръони каримда Аллоҳ таоло Ўзини васф қилиб, шундай деган: «(У) ғайбни билувчидир. Бас, Ўз ғайбидан бирор кимсани хабардор қилмас» («Жин» сураси, 26-оят).

Бошқа бир ояти каримада:

“Айтинг: «Аллоҳ хоҳлаганидан ташқари ўзим учун (бирор) фойда ва зарар (келтириш)га эга эмасман. Агар ғайб (илми)ни билсам эди, хайрли ишларни кўп қилган бўлур эдим ва менга ёмонлик (ҳам) етмаган бўлур эди. Мен фақат имон келтирадиган қавм учун огоҳлантирувчи ва хушхабар берувчидирман» («Аъроф» сураси, 188-оят).

Ҳатто Пайғамбаримиз Муҳаммад алайҳиссалом ҳам ғайбни билишни даъво қилмаганлар. Саҳобалар даврида ҳам бундай ваболар келган. Қанчадан қанча буюк саҳобалар вабодан вафот этишган. Улар Аллоҳ таолодан бундай ёмон гумонда бўлишмаган. Балки, сабр қилишган, Аллоҳдан ажр умид қилишган.

Ушбу кимсанинг қўлидаги ҳассаси ўзидан анча узун, аслида ҳасса нари борса одам бўйи баравар бўлади, қўлидаги тасбеҳ ҳам одатий эмас, балки фолбин, сеҳр-жоду қилувчиларнинг анжомига ўхшайди.

Шу ўринда яна бир муҳим масала бор. Юқоридаги каби тасвирларни кенг тарқалишига ҳисса қўшаётганлар бир нарсани яхши англаб олсинлар. Ҳар бир воқеани оммага кўрсатиш ҳамиша ҳам тўғри бўлавермаслигига инсоннинг ўз фаросати етиши керак.

Қуръони карим ва ҳадиси шарифларда охирги пайғамбар Муҳаммад алайҳиссалом экани ва у кишидан кейин ким пайғамбарлик, расулликни даъво қилса ёлғончи экани аниқ айтиб қўйилган.

Ўзбекистон мусулмонлари идораси бундай хатти-ҳаракатларни қатъий қоралайди. Олинган маълумотларга кўра, ушбу шахс ҳақиқатан Самарқанд вилоятида яшайди. Айни вақтларда Самарқанд вилояти имом-хатиблари томонидан мазкур фуқаро билан Ислом дини ақидаси ва эътиқодий таълимотлар юзасидан суҳбатлар олиб бориш чоралари кўрилаётганини маълум қиламиз" - дейилади Ўзбекистон мусулмонлари идораси Фатво ҳайъати баёнотида.