Умримда ҳеч қачон ичмаганман – Трамп

АҚШ Президенти Дональд Трамп бутун ҳаёти давомида бирор марта ҳам алкоголь ёки наркотик моддаларни синаб кўрмаганини айтди. Бу ҳақда у Британиянинг GB News телеканалига берган интервьюсида маълум қилди.

“Мен умримда ҳеч қачон ичмаганман ва ҳеч қачон наркотик модда қабул қилмаганман”, дейди сиёсатчи.

Трампнинг қўшимча қилишича, у ҳар доим фарзандларига наркотиклар, алкоголь ва сигареталардан йироқ юришни айтиб келади.

“Агар бошламаса, узоқ давом этадиган қарамлик даври бўлмайди”, дейди у.

Маълумот учун, жорий йилда Америка Президенти 79 ёшга тўлди. 7 октябрь куни у “Newsmax” телеканалига берган интервьюсида ўзини 30 йил аввалгидан анча яхши ҳис қилаётганини айтган. Шу тариқа Трамп ижтимоий тармоқларда тарқалган оғир касаллик ҳақидаги фитна назариясига муносабат билдирган. Унинг тарафдорлари республикачи бир неча кун омма олдида кўринмагани ва Оқ уй эълон қилган режада ҳам унинг чиқишлари кўринмагани сабабли бундай иддаоларни илгари сурган эди.