Президент ўқитувчиларнинг ойлигини оширишга ваъда берди. Қирғизистонда!

Қирғизистон Республикаси Президенти Садир Жапаров ўқитувчиларнинг маошини оширишга ваъда берди. Бу ҳақда у бугун, 29 август куни Ўш шаҳрида Валентина Терешкова номидаги янги мактаб интернати биносининг очилиш маросими сўз очди.

“Энди нафақат таълимнинг тузилиши, балки унинг мазмуни ҳам ўзгаради. Янги мактаблар, янги дарсликлар ва методик дастурлар билан бирга биз педагогларнинг иш ҳақини ҳам оширамиз”, дейди Қирғизистон Президенти.

У ушбу таълим муассасаси – биринчи аёл космонавт номини олган мактаб замонавий кўринишда қайта тиклангани ва ўқувчиларни қабул қилишга тайёр эканини таъкидлаган.

“Барчани мустақиллигимизнинг 34 йиллиги арафасида ушбу муҳим воқеа билан табриклайман. Янги билим маскани илм ва эзгу ютуқлар манбаи бўлсин”, дейди Жапаров.

Президент матбуот хизматига кўра, мазкур мактаб 1964 йилда қурилган ва Терешкованинг парвози шарафига унинг номи берилган. Илк йиллардан бошлаб у ижтимоий миссияни бажарган – жанубий ҳудудлардаги кўп болали ва кам таъминланган оилалар фарзандларини таълим билан таъминлаган. Унинг битирувчилари орасида депутатлар, вазирлар ва жамоат арбоблари бор. Қирғизистон Давлат хавфсизлик қўмитаси раҳбари Қамчибек Ташиэв ҳам ушбу мактаб битирувчиси бўлиб, 2022 йилда янги бино қурилиши ташаббусини илгари сурган. 2,3 гектар майдонда 700 ўринли ўқув корпуси ва 500 ўринли ётоқхона бунёд этилган.

Садир Жапаров, шунингдек, мамлакатда олиб борилаётган таълим ислоҳотларини эслатиб ўтган: мактабларда 12 йиллик ўқишга ўтиш, янги стандартларни жорий этиш ва дастурларни янгилаш. Қирғизистонда ўқитувчиларга 27 мингта ноутбук топширилган. 2025-2026 ўқув йилида янги дарсликлар учун 744 млн сўм ажратилган.

Жапаров Терешкова номидаги мактабнинг очилиши бутун мамлакат бўйлаб 100 та ижтимоий объект – мактаблар, боғчалар, шифохоналар, маданий ва спорт марказлари фойдаланишга топширилиши билан бир пайтда амалга ошганини айтиб ўтган.

Маълумот учун, очиқ манбалардаги маълумотларга кўра, Қирғизистонда ўқитувчиларнинг ўртача ойлик маоши 42 500 қирғиз сомини (тахминан 6 млн сўм) ташкил этади.