Истанбулда Максим Галкинга концерт ўтказиш тақиқланди

Россиялик шоуменнинг 25 октябрь кунига режалаштирилган Туркиядаги консерти бекор қилинди. Бунга унинг Исроил борасидаги позицияси сабаб бўлди.

Россиялик шоумен Максим Галкиннинг 25 октябрь куни Истанбулда ўтказилиши режалаштирилган консерти бекор қилинди. Бу ҳақда TRT хабар берди.

Санъаткорнинг чиқиши у Исроилни оммавий қўллаб-қувватлаганига қарши норозиликлар ортидан бекор қилинган. Концерт соат 19:00 да Конгресс марказидаги Ҳарбие залида бўлиб ўтиши керак эди. Бироқ концерт ҳақида маълумот пайдо бўлгач, турк оммавий ахборот воситалари ва ижтимоий тармоқларда санъаткорнинг чиқишига йўл қўймаслик талаби билан кампания авж олди.

Бунга Галкиннинг 2023 йил октябрь ойидан бери Исроилни қўллаб-қувватлаб келаётгани, Ғазога қарши ҳужумларни оқлагани ва жанговар ҳаракатларда ўзи иштирок этиши мумкинлигини айтгани сабаб бўлди.

2023 йил 7 октябрда ҲАМАС операциясидан сўнг Максим Галкин Исроилни қўллаб-қувватловчи баёнот билан чиқди. У мазкур баёнотини “Исроил ғалаба қозонади” дея якунлади. Орадан икки кун ўтиб, 9 октябрь куни санъаткор рафиқаси Алла Пугачёва ва фарзандлари билан нима учун Исроилда қолишга қарор қилганини тушунтирди.

“Мен она томондан яҳудийман. Шунинг учун биз Исроилни танладик. Бундан бир сонияга ҳам афсусланмаймиз”, деган у.

Ўша мурожаатда Галкин Исроилни қўлда қурол билан ҳимоя қилишда иштирок этишга тайёрлигини айтган.

“Агар мен Исроил армиясида хизмат қилганимда ва ҳозир мамлакатни ҳимоя қилиш учун жангга боришимга ҳеч бўлмаганда бирор асос бўлганида, албатта, борардим. Аммо мен Исроилни бошқа йўл билан ҳам қўллаб-қувватлашим мумкин”, деган шоумен.

Шу тариқа санъаткор Исроил аҳолиси билан бирдамлигини таъкидлаган. 2024 йил 8 июнь куни Ғазодаги Нусейрат қочқинлар лагерида Исроил операциясидан сўнг Галкиннинг позицияси янги резонансга айланди.

Операция давомида Исроил кучлари тўрт нафар гаровдаги фуқаросини озод қилди. Аммо 274 нафар фаластинлик ҳалок бўлди, юзлаб одамлар жароҳатланди. Исроил кучларининг ҳаракатларига муносабат билдирган Галкин: “Исроил, мен сен билан фахрланаман!” деб ёзди. Шунингдек, у операция пайтида ҳалок бўлган Исроил полицияси қўмондони Арнон Заморани қаҳрамон деб атади.

Санъаткор ўз постларида фаластинликлар орасида кўплаб қурбонлар бўлганига қарамай, асосий эътиборни гаровга олинганларнинг озод этилиши ва Исроил кучларининг ҳаракатларига қаратган.

“Ғазода озиқ-овқат муаммоси йўқ”

2024 йил 10 июнь куни Галкин Исроилнинг ҳаракатларини ҳимоя қилган ва Ғазодаги гуманитар фалокат ҳақидаги хабарларни шубҳа остига олган 11 банддан иборат батафсил баёнот эълон қилди.

“Ғазо 2005 йилдан бери мутлақо эркин”, деб таъкидлади шоумен.

У, шунингдек, ҲАМАСни ҳалок бўлган фаластинликлар статистикасини манипуляция қилишда айблади.

“ҲАМАС ёлғон статистикани эълон қилмоқда, барча жангарилар ўлимидан сўнг бегуноҳ ‘тинч’ аҳолига айланади ва уларнинг сони ўн марта кўпайтириб кўрсатилади” деб ёзган Галкин.

Яна бир бандда у “Тинч аҳоли одамларни гаровга олганда улар террорчига айланади”, деб таъкидлаган. Маълумот ўрнида, Исроилнинг Ғазога ҳужумлари оқибатида 22 мингдан ортиқ бола ҳалок бўлган. Мазкур маълумот БМТнинг кўплаб ҳисоботлари, инсон ҳуқуқлари ташкилотларининг текширувлари билан тасдиқланган.

Максим Галкиннинг консерти бекор қилинганига муносабати

Россиялик телебошловчи консерти бекор бўлганидан афсусда эканини айтиб, ташкилотчиларнинг баёнотини эълон қилди.

“Ҳурматли томошабинлар! Максим Галкиннинг 2026 йил 25 октябрь куни Истанбул Конгресс марказида бўлиб ўтиши режалаштирилган консерти ўтказилмаслигини чуқур афсус билан маълум қиламиз. Бунга Истанбул губернатори маъмуриятининг жамоат тартиби ва хавфсизлик нуқтайи назаридан тадбирни ўтказишни тақиқловчи расмий қарори сабаб бўлган. Ушбу қарор Туркия давлат органлари томонидан қабул қилинган бўлиб, тадбир ташкилотчиси, санъаткор ёки бошқа иштирокчиларнинг иродасига боғлиқ эмас. Кўрилган саъй-ҳаракатларга қарамай, консертни белгиланган санада ўтказиш ҳуқуқий жиҳатдан имконсиздир. Юзага келган вазиятдан чин дилдан афсусдамиз ва консертга ташриф буюришни режалаштирган барча томошабинлардан узр сўраймиз”, дейилади хабарда.