Японияда олимлар инсонга чўчқа буйрагини кўчирмоқчи

Японияда тиббиёт тарихидаги муҳим тажрибалардан бири ўтказилиши кутилмоқда. Олимлар 2028 йилдан бошлаб генетик ўзгартирилган чўчқа буйракларини инсонларга кўчириб ўтказиш бўйича клиник синовларни бошлашни режалаштирмоқда. Бу ҳақда “The Japan Times” хабар берди.

Қайд этилишича, мазкур лойиҳа Мэйдзи университети негизида ташкил этилган PorMedTec биотехнологик стартапи томонидан амалга оширилмоқда. Компания АҚШнинг eGenesis биотехнологик фирмаси томонидан яратилган генетик модификация қилинган чўчқалардан фойдаланмоқда.

Режага кўра, чўчқалардан олинган буйраклар Саппородаги Хоккайдо университети шифохонаси ҳамда Канагава префектурасидаги Шонан Камакура умумий шифохонасида беморларга кўчириб ўтказилади.

Мутахассисларнинг фикрича, ҳайвондан инсонга орган кўчириш трансплантация учун донор органлар етишмовчилигини камайтиришнинг истиқболли йўлларидан бири ҳисобланади.

Маълум қилинишича, eGenesis компанияси томонидан боқилган чўчқаларда иммун тизимининг янги органни рад этишини камайтириш ва ҳайвон вирусларининг инсонга юқиш хавфини пасайтириш мақсадида 69 та генетик ўзгариш ўтказилган.

АҚШда ҳозирга қадар ушбу технология асосида тўртта клиник синов олиб борилган. Айрим беморлар операциядан сўнг бир неча ой давомида диализ муолажасига эҳтиёж сезмаган.

Японияда ҳозирда 300 мингдан ортиқ инсон буйрак етишмовчилиги сабабли диализ муолажасини олмоқда. Шунингдек, қарийб 15 минг нафар бемор буйрак трансплантациясини кутмоқда. PorMedTec раҳбари ва Мэйдзи университети профессори Хироши Нағашима турлараро трансплантация келажакда самарали тиббий технологияга айланиши учун ишлар давом эттирилишини билдирган.