Трамп Венесуэлага зарба беришни буюрди. Мадуро армияни оёққа турғизди – ОАВ

Бугун, 3 январь куни АҚШ Президенти Дональд Трамп Венесуэладаги қатор объектларга, жумладан, ҳарбий нишонларга зарбалар бериш ҳақида буйруқ берган. Бу ҳақда ўз манбаларига таяниб, CBS News телеканали журналисти хабар берди.

Телеканалга кўра, Трамп Венесуэла ҳудудидаги объектларга, жумладан ҳарбий инфратузилмага зарба беришни буюрган. Бу қарор бугун, 3 январь куни эрта тонгда АҚШ маъмурияти Венесуэла Президенти Николас Мадуро режимига қарши кампанияни кучайтирган бир пайтда қабул қилинган.

Қайд этилишича, бу зарбалар АҚШнинг минтақадаги ҳарбий салоҳиятини бир неча ой давомида ошириб бориши ортидан амалга оширилган. Хусусан, энг йирик авиация ташувчиси USS Gerald R. Ford ва бошқа кўплаб ҳарбий кемалар Кариб денгизига жойлаштирилган эди.

Венесуэла Президенти Николас Мадуро эса мамлакатнинг кенг қамровли мудофаа тизимини зудлик билан ишга тушириш ва миллий кучларни сафарбар этиш ҳақида буйруқ берган.

“Президент Николас Мадуро миллий мудофаанинг барча режаларини амалга оширишни буюрди. У дарҳол қуролли қаршиликка ўтиш тўғрисидаги фармонни кучга киритишни топширди. Бутун мамлакат ушбу империалистик тажовузни қайтариш учун сафарбар қилиниши лозим”, дейилади хабарда.

Шунингдек, Мадуро Миллатнинг кенг қамровли мудофааси қўмондонлигини, шунингдек Венесуэланинг барча штат ва муниципалитетларида кенг қамровли мудофаа органлари бошқарувларини зудлик билан ишга туширишни буюрган.

CNN маълумотларига кўра, Венесуэла ҳукумати АҚШ ҳаракатларини қоралаб, уларни “ўта жиддий ва қўпол ҳарбий тажовуз” деб атаган. Расмий баёнотда АҚШ Каракас ҳамда Миранда, Арагауа ва Ла-Гуайра штатларига ҳужум қилганликда айбланган. 

Шунингдек, Венесуэла Мудофаа вазирининг уйи Форт Тиуна ҳарбий базасида ўққа тутилгани айтилмоқда. Унинг тақдири ҳақида ҳозирча ҳеч қандай маълумот йўқ.

Эслатиб ўтамиз, бугун, 3 январь куни эрталабдан бери Венесуэла пойтахтида ва мамлакатнинг бошқа аҳоли пунктларида портлашлар содир бўлгани ҳақида хабар берилган эди.

Бунинг ортидан Колумбия Президенти Густаво Петро Венесуэла пойтахти Каракас ҳарбий ҳужумга учраётганини маълум қилди.

Қайд этиш жоиз, 2025 йил куз бошида АҚШ Кариб денгизи ҳудудига ўзининг энг замонавий Gerald Ford авиация ташувчисини, эсминецлар ва қирувчи самолётларни юборган эди. Сентябрь ойидан буён гиёҳванд моддалар ташиётган кемаларга зарбалар берилмоқда. АҚШ Президенти Дональд Трамп маъмурияти Николас Мадурони Венесуэланинг ҳуқуқий президенти сифатида тан олмайди ва мамлакат ҳукуматини наркотрафикка қарши етарлича кураш олиб бормаётганликда айблайди.

17 декабрь куни Трамп Венесуэлага бораётган ва ундан чиқаётган, санкциялар остидаги барча нефть танкерларини тўлиқ блокадага олиш буйруғини берганини эълон қилган.

Сентябрь бошида CNN Трамп Венесуэла ҳудудидаги наркокартелларга зарба бериш вариантини кўриб чиқаётганини хабар берган эди. Бироқ ноябрь ўрталарига келиб, Трамп Венесуэлада қуруқликдаги ҳарбий операция ўтказиш ёки ўтказмаслик бўйича ҳали қарор қабул қилмагани маълум қилинган.