Пайғамбар Муҳаммад (с.а.в.)нинг дунё ҳукмдорларига йўллаган мактублари Ўзбекистонга олиб келинади

Пайғамбар Муҳаммад (с.а.в.)нинг дунё ҳукмдорларига ёзган мактубларининг папирусга кўчирилган нусхаси Ўзбекистондаги Ислом цивилизацияси маркази экспозициясидан ўрин олиши режалаштирилмоқда. Бу ҳақда марказ матбуот хизмати хабар берди.

Қайд этилишича, экспозицияда ана шундай улкан маънавий ва тарихий қимматга эга нусхалардан бири – император Ҳирақлюс (Гераклиюс)га юборилган мактубнинг илмий асосланган реконструкцияси намойиш этилади. Шу билан бирга, экспозицияда Эфиопия, Миср, Баҳрайн, Уммон ҳукмдорлари, Форс шоҳига юборилган мактублар нусхалари ҳам ўрин олиши кутилмоқда.

“Ушбу хатлар нафақат Исломнинг тинчликпарвар ва дипломатик руҳини, балки Расулуллоҳ (с.а.в.)нинг сиёсий заковати ва инсонпарварлигини ҳам ёрқин намоён этувчи тарихий далиллардир”, дейилади хабарда.

Ўзбекистон мусулмонлари идорасига кўра, Муҳаммад пайғамбарнинг Византия (Шарқий Рим) императори Ҳирақлюсга уни Ислом динига даъват этиб ёзган мактуби Иорданиядаги “Қирол Ҳусайн” масжиди музейида сақланмоқда. Бу мактуб ҳижрий 7 йилда, Муҳаррам ойида, милодий 628 йилда ёзилган.