Ўзбекистонга борганда рус тилисиз мулоқот қилиб бўлмайди – Садир Жапаров

Рус тили Қирғизистон учун зарур ва бу тилнинг расмий мақомини ўзгартириш таклифлари нотўғри. Бу ҳақда Қирғизистон Президенти Садир Жапаров “Kabar” агентлигига берган интервьюсида сўз очди.

“Рус тили бизга эмас, биз рус тилига муҳтожмиз”, деган давлат раҳбари. 

У, шунингдек, Қирғизистон конституциясида рус тили расмий тил деб белгиланганини эслатган. Президентнинг фикрича, рус тили дунёдаги энг муҳим олти тилнинг бири ҳисобланади.

“МДҲ давлатларини айтмай турайлик, қўшни Ўзбекистон ва Тожикистонга борсангиз, рус тилисиз мулоқот қилиб бўлмайди. Европа, Америка, Хитойда ҳам рус тили таржимонларидан фойдаланишади”, деган Жапаров. 

У, шунингдек, баъзи сиёсатчиларнинг рус тилининг мақомини ўзгартириш ҳақидаги таклифларини нотўғри деб атаган. 

“Албатта, энг аввало ўз она тилимизни ривожлантиришимиз керак. Бироқ рус ва инглиз тилларини ҳам билишимиз лозим”, дея қўшимча қилган Қирғизистон Президенти.