Роналду фаолиятини қаерда давом эттиришини айтди

Португалиялик 40 ёшли ҳужумчи Криштиану Роналду келажакда қаерда ўйнаши борасидаги саволларга жавоб бериб, Саудия Арабистонининг “Ал-Наср” клубида қолишни режалаштираётганини ва жамоа билан янги шартнома имзолашга тайёр эканини айтди. Бу ҳақда у кеча, 8 июнь куни Испанияга қарши Миллатлар лигаси финалидан кейин маълум қилди.

“Келажагим нима бўлади? Аслида, ҳеч нарса ўзгармайди. “Ал-Наср”да қоламанми? Ҳа”, деган Роналду.

Маълумот учун, кеча, 8 июнь куни Португалия Испанияга қарши Миллатлар лигаси финалида ўйнаб, пенальтилар сериясида ғалаба қозонди. Ўйинда Роналду 1 та гол урди. Шу тариқа португаллар 2-марта ушбу турнир ғолибига айланди.

Қайд этиш жоиз, португалиялик ҳужумчининг “Ал-Наср” билан амалдаги шартномаси 2025 йилнинг июнигача тузилган. Бироқ май ойида “Marca” нашри Роналду ёзда клубни тарк этиши мумкинлиги ҳақида хабар берган. Нашрга кўра, “Ал-Наср” раҳбарияти Роналдунинг жамоанинг сўнгги муваффақиятсизликларига нисбатан ғазаб билан жавоб берганидан норози бўлган.

Май охирида эса Роналдунинг ўзи ҳам клубдан кетиши мумкинлигига ишора қилганди. Саудия чемпионатининг сўнгги туридан кейин у Instagram саҳифасида “Бу боб якунланди. Тарих эса ёзилмоқда. Ҳаммадан миннатдорман”, деб ёзган эди.

40 ёшли Роналду 2023 йилдан буён “Ал-Наср” шарафини ҳимоя қилмоқда, бироқ у билан клуб ҳозирча бирор муҳим совринни қўлга киритмаган. Жорий мавсумда у 41 ўйинда майдонга тушиб, 35 та гол ва 4 та голли узатмага муаллифлик қилган.