28 ноябрь куни Ўзбекистон Республикаси Бош вазири Абдулла Арипов раҳбарлигида аҳоли ва ижтимоий соҳа объектларини энергоресурслар — газ ва электр энергия билан таъминлашдаги муаммоларга бағишланган видеоселектор йиғилиши бўлиб ўтди. Бу ҳақда «Xabar.uz» сайти хабар берди.
Танқидий-таҳлилий руҳда ўтган йиғилишда Бош вазир совуқ тушиши билан истеъмолчиларнинг электр энергияси ва газга бўлган талаби кескин ошишини айтиб, ҳали қиш кирмасдан туриб, энергоресурслар таъминотида ўта жиддий муаммолар пайдо бўлгани, метро ва телевидениеда электр энергияси билан юз берган нохуш ҳолатларни кескин танқид қилди.
«Бу шармандали ҳолат, – деди Бош вазир Абдулла Арипов. – Оммавий ахборот воситалари, интернет нашрлар ва ижтимоий тармоқларда бу ҳақда аҳолининг ҳақли эътирозлари кенг ёритилмоқда. Газ ва электр энергия етказиб берувчилар ўз ишларига масъулият билан қарашмаяпти.
Мутасадди раҳбарлар шунча салбий ҳолатларга бирон марта оммавий ахборот воситалари орқали тушунтириш ёки асосли жавоб бергани йўқ. Мисол учун, 27 ноябрь куни сутка давомида 110 киловольт кучланишли 144та линияда жами 300 мартадан ортиқ чеклов амалга оширилган. Ушбу линияларда 1 ярим соатдан 5 соатгача чеклов киритилиши қанчалик адолатга тўғри келади?
Бу каби ҳолатлар натижасида аҳоли томонидан нафақат Энергетика вазирлигига нисбатан, балки бутун Ҳукуматга нисбатан эътироз пайдо бўлмоқда. 31 минг 413 та ҳолатда электр энергиядан ноқонуний фойдаланиш ҳолати аниқланган, зарар миқдори эса 22 миллиард сўмни ташкил қилади. Газ тармоқларига ўзбошимчалик билан уланиш ҳолатлари жудаям кўп. Натижада жабрини аҳоли кўряпти».
Бош вазир, шунингдек, белгиланган режа асосида газ истеъмолчиларга етиб бормаганини қоралади. Энергоресурслар тежамкорлигига эътибор берилмаётгани, тушунтириш ишлари самарали бўлмаётганини танқид қилди.
Тасодифий хабарлар
Наманганда пул ишлаб топиш ўрнига уларни босма қилишга ўринган шахслар қўлга олинди
Янги Наманган тумани ҳокимлиги ташкил этилди
Қозоғистонда олти нафар ўзбекистонликни қулликка сотган шахс қўлга олинди
Жасур Умировнинг ишини «ёпди-ёпди» қилган терговчи ҳаракатларини прокуратура ўрганади
Судья чет элда ишлаётган кўпгина ўзбек аёлларини фоҳишага чиқарди