24 соат тупроқ остида қолган 11 ойлик чақалоқ тирик ҳолда топилди

АҚШнинг Жанубий Каролина штатида қарийб 24 соат давомида тупроқ остида қолган 11 ойлик чақалоқ тирик ҳолда топилди. Бу ҳақда “Reuters” хабар берди. 

Воқеа кеча, 10 ноябрь куни содир бўлган. Коа Шарп исмли чақалоқ онасининг уйида отаси Майкл Комернинг қарамоғида қолган. Она юмуш билан ташқарига чиққанидан сўнг бола бедарак йўқолган. Бу ҳақда хабар берилиши билан полиция ва қутқарувчилар кенг кўламли қидирув ишларини бошлаган.

Қидирув гуруҳи чақалоқни Комернинг отасига тегишли уйдан тахминан 45 метр узоқликдаги ўрмон ҳудудидан топган. У ерда яқинда ковланган тупроқ излари аниқланган. Чақалоқ сочиққа ўралган ҳолда итлар қафаси ичига жойлаштирилиб, саёз чуқурликка кўмилган бўлган.

Лексингтон округи шерифи Жей Кун матбуот анжуманида чақалоқнинг йиғисини эшитиш қидирувчилар учун энг қувончли лаҳза бўлганини айтган.

“Биз 11 ойлик Коани тирик, ҳаёт учун курашаётган ва йиғлаётган ҳолатда топдик. Чақалоқнинг йиғисини эшитишдан ортиқ қувончли овоз йўқ“, деган у.

Маълум қилинишича, боланинг отаси Майкл Комер жорий йилнинг 9 ноябрь куни кечқурун ўғрилик ва ҳибсга олишга қаршилик кўрсатишда гумонланиб қўлга олинган. Шерифнинг айтишича, унга қўшимча айбловлар қўйиш масаласи прокуратура билан муҳокама қилинмоқда.

Ҳозирда чақалоқ шифохонада. Шифокорлар унинг соғайиб кетишига умид қилмоқда.