Швейцария Алишер Усмоновга нисбатан санкцияларни бекор қилди

Швейцария Россиянинг икки миллиардери – Алишер Усмонов ва Михаил Фридманга нисбатан санкцияларни бекор қилди, бироқ чекловлар рўйхатига Россияга оид яна 254 та янги бандни қўшди. Бу ҳақда РБК хабар берди.

Швейцария Иқтисодиёт бўйича давлат котибияти (SECO) томонидан эълон қилинган маълумотларга кўра, Фридман ва Усмоновдан ташқари, Қрим федерал университетининг собиқ ректори Андрей Фалалеев ҳамда Redbird Corporate Services Ltd компаниясига нисбатан ҳам санкциялар бекор қилинган.

Бундан ташқари, Россия Давлат думаси собиқ депутати Юрий Швиткин ва конструктор Александр Леонов вафот этгани сабабли улар ҳам санкциялар рўйхатидан чиқарилган.

Шу билан бирга, Швейцария санкциялар рўйхатига 254 та янги банд киритган. Улар орасида Россиянинг 33 та банки, учинчи давлатдаги битта банк, 17 та молиявий муассаса ва криптохизматлар етказиб берувчиси, учинчи давлатларга тегишли бешта компания, шунингдек, Россиянинг тўртта аэропорти ва иккита порти бор.

SECO маълумотига кўра, Швейцария ташқи сиёсий ва ҳуқуқий омилларни баҳолаганидан сўнг, Россиянинг икки фуқаросини ҳозирча санкция рўйхатига киритмасликка қарор қилган. Шунингдек, учинчи давлатларга тегишли 14 та компанияга нисбатан экспорт назоратини кучайтириш чоралари ҳам қўлланилмаган.

Таъкидланишича, Европа Иттифоқининг санкциялар бўйича 20-пакетида жорий этилган амалий чоралар савдо чекловларини четлаб ўтишнинг олдини олишга қаратилган.