Хитойда пора олган амалдор қатл этилди

Бугун, 9 декабрь куни Хитойда “China Huarong International Holdings” компаниясининг собиқ бош директори Бай Тянхуй 1,1 миллиард юань (тахминан 156 миллион доллар) миқдорида пора олганликда айбдор деб топилиб, осиб ўлдирилди. Бу ҳақда Хитой марказий телевидениеси хабар берди.

Қайд этилишича, жиноятчи Бай Тянхуй 2014-2018 йиллар давомида фаолият юритиб келган компаниялардаги юқори лавозимларидан фойдаланиб, катта миқдорда пул ва активларни ноқонуний равишда қабул қилиб келган.

У 2024 йил май ойида Тянжин шаҳрида ўлим жазосига ҳукм қилинганди. У февраль ойида юқори судга берган апелляциясида ютқазди, шундан сўнг Хитой Олий суди ҳукмни тасдиқлади. Байнинг оиласи воқеа юзасидан изоҳ беришни рад этди.

Бу қатл Хитойнинг молия секторида сўнгги йилларда кучайтирилган коррупцияга қарши кураш кампаниясининг навбатдаги йирик ишидир. 2021 йилда Ҳуаронгнинг собиқ раиси Лай Сёмин 1,79 миллиард юань пора олганликда айбланиб, Хитой тарихидаги энг йирик корпоратив коррупция ишларидан бирида қатл этилган эди.

Аввалроқ Шимолий Кореяда “кибрланган“ тадбиркор жуфтлик қатл этилгани ҳақида хабар берилганди. Пхеньянда ўтказилган қатлни юзлаб одамлар, ҳатто болалар ҳам мажбуран томоша қилган. Ёши 50 атрофидаги тадбиркорлар электровелосипедлар, аккумуляторли мотоцикллар учун қисмлар ва оддий велосипедларни сотиш, таъмирлаш ҳамда ижарага бериш билан шуғулланган. Улар расман Садонг тумани касаба уюшмалари федерацияси орқали рўйхатдан ўтган бўлса-да, катта даромад топгани сабаб “катта раҳбарлар” сифатида танилган.