Ашхободда йигит ва қизларнинг бирга юриши тақиқланди – ОАВ

Туркманистон пойтахти Ашхободда маҳаллий полиция ўғил ва қиз болаларнинг хиёборларда бирга бўлишни тақиқлади. Бу ҳақда “Настоящее время” ёзмоқда.

“Милиция ходимлари ёшларнинг ҳужжатларини текширмоқда, кўпинча бу пойтахтнинг Илҳом боғида кўзга ташланмоқда. Агар йигит қиз унинг синглиси эканини айтса, у ҳолда буни тасдиқловчи ҳужжатлар талаб қилинади”, дейилади хабарда.

Қайд этилишича, агар қиз йигитнинг курсдоши бўлиб чиқса, у ҳолда ёшлар маҳкамага олиб кетилади. Сўнгра уларнинг шахсига аниқлик киритиш ва ота-онасига хабар бериш мақсадида таълим муассасасига мурожаат қилинади. Шунингдек, ҳолат юзасидан университет раҳбарияти ҳам хабардор қилинади.

Ҳуқуқ-тартибот идоралари ходимлари бундай ҳаракатларнинг сабаби бўйича ҳозирча изоҳ бермаган.