Сунъий интеллект чатларидаги сирлар сотувга чиқиши мумкин

Сунъий интеллект асосидаги чатботларни ишлаб чиқувчи Character.AI компаниясининг банкротлик жараёни миллионлаб фойдаланувчиларнинг шахсий маълумотлари тақдири борасида хавотирларни келтириб чиқарди. Бу ҳақда BBC хабар берди.

Платформа фойдаланувчиларга турли виртуал персонажлар билан суҳбатлашиш имконини беради. Ундан ўн миллионлаб одамлар, жумладан, вояга етмаганлар ҳам фойдаланган. Айримлар чатботларга шахсий ҳаёти, муносабатлари ва руҳий кечинмалари ҳақидаги махфий маълумотларни ишониб топширган.

Компания банкротлик жараёнида айрим активларини 20 миллион долларга Disney компаниясига бериш бўйича келишувга эришган. Гарчи ушбу битим фойдаланувчиларнинг шахсий маълумотларини қамраб олмаса-да, суд ҳужжатларида Character.AI маълумотлари бошқа харидорларга сотилиши мумкинлиги қайд этилган.

Вазият АҚШда ҳам жиддий эътирозларга сабаб бўлди. 40 нафар штат бош прокуроридан иборат коалиция суддан компания активларини сотиш жараёнида болалар хавфсизлиги ва фойдаланувчилар махфийлигини ҳимоя қилиш чораларини кўришни сўради.

Чатботларга ишониб айтилган сирлар кимнинг қўлига ўтиши мумкин?

Электрон махфийлик ахборот марказининг (EPIC) сунъий интеллект ва инсон ҳуқуқлари дастури директори Калли Шредернинг тушунтиришича, инсон қиёфасидаги чатботлар билан суҳбатлашиш жараёнида одамлар одатдагидан кўпроқ шахсий ва нозик маълумотларини ошкор қилиши мумкин.

Бундан ташқари, бундай суҳбатларда фақат фойдаланувчининг ўзи ҳақидаги маълумотлар эмас, балки унинг оила аъзолари, дўстлари ва танишларига тегишли махфий маълумотлар ҳам тарқалиши эҳтимоли бор.

Мутахассисларнинг хавотири шундаки, сунъий интеллект компаниялари банкрот бўлганда ёки бошқа корхоналар билан бирлашганда, улар тўплаган маълумотлар янги эгалар ихтиёрига ўтиши мумкин.

Character.AI махфийлик сиёсати компанияга фойдаланувчилар маълумотларидан янги функциялар яратиш, сунъий интеллект моделларини ўқитиш, алгоритмларни ривожлантириш ва мақсадли реклама учун профиллар шакллантиришда фойдаланиш имконини беради.

Шредер бундай маълумотларнинг бошқа компаниялар қўлига ўтиши шахсий ҳаёт дахлсизлиги учун жиддий хавф туғдиришини таъкидлаган.

Сунъий интеллект компанияларини қандай хавф кутмоқда?

BBC билан суҳбатлашган мутахассислар сунъий интеллект тизимларини яратиш ва ишлатиш катта харажат талаб қилишини таъкидлаган. Айрим компаниялар эса узоқ муддат давомида фойда кўрмаслиги мумкин.

Шу сабабли сунъий интеллект бозорида молиявий инқироз юзага келиши компанияларнинг ёпилиши ёки бирлашишига олиб келиши эҳтимоли бор. Бундай вазиятда улар тўплаган фойдаланувчилар маълумотлари қимматли активга айланиши мумкин.

АҚШнинг Шимолий Каролина университети ҳуқуқ профессори Мелисса Жейкобининг фикрича, амалдаги махфийлик қонунчилиги банкротлик жараёнида фойдаланувчиларни ҳар доим ҳам етарлича ҳимоя қила олмайди.

Фойдаланувчилар ўз маълумотларини қандай ҳимоя қилиши мумкин?

Мутахассислар сунъий интеллект хизматларидан фойдаланишда шахсий маълумотларга эҳтиёткорлик билан муносабатда бўлишни тавсия қилмоқда.

Жумладан, фойдаланилмаётган сунъий интеллект хизматларидаги ёзишмалар ва шахсий маълумотларни ўчириш, махфийлик созламаларини текшириш ҳамда зарур ҳолларда компаниянинг қўллаб-қувватлаш хизматига мурожаат қилиш мумкин.

Character.AI ҳам фойдаланувчилар учун аккаунтни ўчириш бўйича кўрсатма эълон қилган

Мутахассислар сунъий интеллект хизматларига махфий маълумотларни киритишдан олдин уларнинг қандай сақланиши ва ишлатилишига эътибор қаратишга чақирмоқда.