“Энг гўзал қотил” умрбод қамалди

Жанубий Корея пойтахти Сеулда “энг гўзал қотил” деб лақаб олган 20 ёшли Ким Со Ён эркакларни заҳарлаш иши бўйича умрбод озодликдан маҳрум этилди. Бу ҳақда “Chosun” хабар берди.

Қайд этилишича, суд муҳокамаси давомида Ким Со Ён жабрланувчиларни шунчаки ухлатиб қўймоқчи бўлганини ва улар ўлиб қолиши мумкинлигини хаёлига ҳам келтирмаганини айтган. Қиз уларни ухлатиб, гўёки жинсий зўравонликдан ҳимояланмоқчи бўлганини билдирган.

Бироқ суд Ким жиноятни содир этиш вақтида препаратлар таъсиридан жабрланувчилар вафот этиши мумкинлигини англаганини аниқлаган ва унда қотиллик қасди бўлган деган хулосага келган. KakaoTalk’даги ёзишмалар ва ишнинг бошқа материалларини ўрганиб чиққач, судья жинсий зўравонлик юз бергани ҳақида ҳеч қандай исбот топмаган. Олти нафар жабрланувчидан бирига нисбатан оғир ҳужум қилиш айблови бўйича суд уни айбсиз деб топган. Биринчи инстанция судининг ҳукми ҳозирча якуний эмас ва унинг устидан шикоят қилиниши мумкин.

Ўзи нима бўлган?

Жиноятлар 2025 йилнинг охири ва 2026 йилнинг бошида Сеулнинг Канбук туманидаги меҳмонхоналарда юз берган. 20 ёшли Ким Со Ён ижтимоий тармоқлар, иловалар ва барларда эркаклар билан танишган ҳамда уларни мотелларга таклиф қилган. У ўзи билан тенг уч нафар эркакка бензодиазепин гуруҳига кирувчи дори воситалари солинган ичимликларни бериб, улардан икки нафарининг ўлимига ва бир нафарининг ҳушдан кетишига сабаб бўлгани учун март ойида ҳибсга олинган ва айблов эълон қилинган. Кейинги суриштирувлар давомида, шу йилнинг апрель ойида унга худди шу усулда яна уч нафар эркакка тан жароҳати етказгани бўйича қўшимча айблов қўйилган.

18 августда бўлиб ўтган суд мажлисида прокурорлар Ким Со Ёнга ўлим жазоси берилишини сўраган. Шунингдек, улар суддан уни 30 йил давомида электрон кузатув қурилмасини тақишга мажбур қилиш ва пробация назоратини ўрнатишни сўраган.