“Исроил, тўхта”. Трамп Исроилга тийилишни буюрди

Бугун, 24 июнь куни АҚШ Президенти Дональд Трамп Исроил ҳукуматига Эронга қарши бомба ташламасликни буюрди. Бу ҳақда у ўзининг Truth Social ижтимоий тармоғида ёзиб қолдирди.

Президентнинг сўзларига кўра, агар Исроил Эронга қарши бомба ташласа, тинчлик сулҳини бузган бўлади. 

“Исроил! Ўша бомбаларни Эронга ташламанг! Агар сиз бу ишни амалга оширсангиз, келишувни бузган бўласиз! Ҳозироқ ҳарбий учувчиларингизни ортга қайтаринг! Уйга қайтинг”, дея ёзган Оқ уй раҳбари. 

Президентнинг ушбу баёноти Исроил Мудофаа вазири Исроил Кац ўз ҳарбийларига Теҳрон марказидаги объектларга кучли зарбалар беришни топширганидан кейин янгради. Вазирга кўра, ушбу зарбалар тинчлик битими тузилганига қарамай, Эроннинг Исроилга қилинган ҳужумига жавоб сифатида йўлланилади. 

Қайд этилишича, ўт очишни тўхтатиш режими кучга кирганидан сўнг, Эрондан Исроил томон икки баллистик ракета учирилган. Хабарларга кўра, иккала ракета ҳам тутиб қолинган. Эрон давлат телерадиокомпанияси эса ўт очишни тўхтатиш эълон қилингандан кейин Эрон ҳудудидан ракета учирилгани ҳақидаги хабарларни рад этган.

Тинчлик режаси 

Бугун, 24 июнь куни Эрон томонидан Исроилга қарши тўртта ҳужум тўлқинидан сўнг ўт очишни тўхтатиш сулҳи кучга кирди. Кейинроқ буни АҚШ Президенти Дональд Трамп тасдиқлади. Қолаверса, Исроил расмийлари ҳам Эрон билан ҳарбий можарода аввалроқ АҚШ Президенти Дональд Трамп томонидан эълон қилинган ўт очишни тўхтатиш келишуви кучга кирганини тасдиқлади. Сулҳга кўра, Исроил ва Эрон 12 соатга тўлиқ ва буткул ўт очишни тўхтатишга рози бўлган. Эрон расман сулҳни бошлаши, 12 соатдан кейин Исроил ўт очишни тўхтатиши ҳамда 24-соатда эса дунё 12 кунлик урушнинг расман якунланганини кутиб олиши керак эди. Аммо Трамп тузган сценарий изидан чиқиб кетди.