FIFA Исроил ва Фаластин ўртасида ўйин ташкиллаштирмоқчи

FIFA Исроил ва Фаластин терма жамоаларига АҚШда жорий йилнинг сентябрь ойида бўлиб ўтадиган 15 ёшгача бўлган футболчилар учун янги футбол фестивалини очиб беришини таклиф қилмоқда. Бу ҳақда ташкилот режаларидан хабардор манбаларга таяниб, “The Athletic” нашри хабар берди. 

Ташаббус FIFA президенти Жанни Инфантино томонидан илгари сурилган бўлиб, у Исроилни мусобақалардан четлатишни талаб қилиб келаётган фаоллар ва халқаро инсон ҳуқуқлари ташкилотларининг кўп йиллик чақириқлари фонида пайдо бўлди.

Нашр маълумотларига кўра, Исроил ва Фаластин ўртасида ўйин ўтказиш ғояси FIFA президенти Жанни Инфантино жорий йил апрель ойида Ванкувер шаҳрида бўлиб ўтган FIFA конгрессида икки томон футбол федерациялари вакилларининг қўл бериб кўришиши ва биргаликда суратга тушишини ташкил этишга уринганидан сўнг пайдо бўлган.

Ушбу фестиваль FIFA Кенгаши томонидан 2025 йил декабрь ойида эълон қилинган эди. Учрашувлар қисқартирилган форматда ва кичрайтирилган майдонларда ўтказилади, жамоалар эса етти нафардан тўққиз нафаргача футболчидан иборат бўлади.

Дастлабки фестиваль Майами шаҳрида ўтказилиши режалаштирилган бўлиб, фақат ўсмирлар жамоалари учун мўлжалланган. 2027 йилда эса FIFA қизлар жамоалари учун ҳам шунга ўхшаш фестиваль ташкил этишни режалаштирмоқда.