Ўзбекистон олтин экспортини қайта тиклади

Ярим йиллик танаффусдан сўнг Ўзбекистон олтин экспортини қайта тиклади. Бу ҳақда Статистика қўмитаси эълон қилган маълумоиларда келтирилган.

Унга кўра, жорий йилнинг дастлабки тўрт ойида мамлакат 1,5 млрд АҚШ доллари қийматидаги олтинни экспорт қилган.

Ушбу экспортнинг асосий қисми апрель ойига тўғри келган. Ўзбекистон йилига қарийб 130 тонна олтин қазиб олувчи мамлакатлар қаторига киради. Шу сабабли, олтин мамлакат иқтисодиёти учун муҳим стратегик ресурс ҳисобланади. У нафақат экспорт тушумларини оширади, балки бюджет барқарорлиги ва валюта захиралари учун ҳам катта аҳамиятга эга.

2025 йилнинг сентябрь ойидан кейин Ўзбекистон олтин экспортини амалда тўхтатиб қўйган. Бу даврда Марказий банк дунёдаги қимматбаҳо металнинг энг йирик харидорларидан бирига айланган. Яъни, мамлакат олтинни ташқи бозорга чиқаришдан кўра, захираларни мустаҳкамлашни афзал кўрган.

Экспертлар бундай қарорнинг бир нечта асосий сабабларини келтирмоқда.

Биринчидан, жаҳон бозорида олтин нархи рекорд даражага етди. Бундай вазиятда шошилинч сотув эмас, балки стратегик кутиш фойдалироқ бўлиши мумкин.

Иккинчидан, олтин-валюта захираларини кўпайтириш иқтисодий хавфсизлик учун муҳим вазифа ҳисобланади.

Олтин Ўзбекистон иқтисодиётида ўзига хос “хавфсизлик ёстиқчаси” вазифасини бажаради. Жаҳон бозорларида ноаниқлик кучайганда, валюта курслари тебранганда ёки ташқи савдо шароитлари ўзгарганда, олтин-валюта захиралари мамлакатнинг молиявий барқарорлигини таъминлашга ёрдам беради. Бу нуқтаи назардан, экспортнинг вақтинча тўхтатилиши Ўзбекистон учун зарарли бўлмаган. Экспорт қайта тикланганидан сўнг, мамлакат қисқа муддат ичида 1,5 млрд доллар миқдорида даромад олган