Қамал бошланди: АҚШ Эрон портларини блокада қилди

АҚШ Президенти Дональд Трамп топшириғига биноан Америка ҳарбийлари Ҳормуз бўғозида расман блокада бошлади. Бу ҳақда Оқ уй раҳбари Truth Social тармоғида ёзиб қолдирди.

Блокада кеча, 13 апрель куни АҚШнинг шарқий вақти билан соат 10:00 да кучга кирган.

АҚШ ОАВлари, жумладан CNN ва Fox News хабар беришича, Америка ҳарбий-денгиз кучлари бўғозга кириш ёки чиқишга уринаётган кемаларни тўхтатишни бошлаган.

Дональд Трамп ўз баёнотида агар бирор кема блокадага яқинлашса, у дарҳол йўқ қилиниши ҳақида огоҳлантирган. Унинг айтишича, АҚШ кучлари “тез ва қатъий” ҳаракат қилади. Шунингдек, у Эрон флотининг катта қисми йўқ қилинганини даъво қилган.

“Эроннинг кемалари денгиз тубида бутунлай йўқ бўлиб кетган. Биз уларнинг оз сонли, улар “тезкор ҳужум” деб атайдиган кемаларига зарба бермадик, чунки биз уларни таҳдид деб ҳисобламадик. Огоҳлантириш: Агар ушбу кемалардан бирортаси бизнинг блокадамизга яқинлашса, улар дарҳол йўқ қилинади. Бу тез ва шафқатсиз”, деган Оқ уй раҳбари.

Эрон томони эса бу ҳаракатни кескин рад этган. Юқори мартабали ҳарбий маслаҳатчи Мухсин Ризоий АҚШнинг блокадаси “муваффақиятсизликка маҳкум” эканини билдириб, мамлакат ҳарбийлари ҳар қандай таҳдидга қарши жавоб бериш учун “катта имкониятларга” эга эканини таъкидлаган.

Маълумот учун, Ҳормуз орқали жаҳон нефтининг тахминан 15–20 фоизи ва суюлтирилган газнинг 30 фоиздан ортиғи ўтади. Шу боис, бу ҳудуддаги ҳар қандай кескинлик глобал энергетика бозорига жиддий таъсир кўрсатади.

Қайд этиш жоиз, блокада ҳақидаги қарор Исломободда ўтган АҚШ ва Эрон ўртасидаги музокаралар натижасиз якунланганидан сўнг қабул қилинган. Томонлар кўплаб масалаларда яқинлашган бўлса-да, асосий келишмовчилик ядровий дастур бўйича сақланиб қолган.