Аёл 13-фарзандини дунёга келтирди

Қозоғистоннинг Темиртау шаҳрида яшовчи 48 ёшли аёл 13-фарзандини дунёга келтирди. Бу ҳақда “Nur.kz” хабар берди.

Маълум қилинишича, жорий йилнинг 2 март куни Лариса Кузнецова вилоят клиник шифохонасининг 1-сонли перинатал марказида ўғил фарзандли бўлган. Чақалоқ 3650 грамм вазнда ва 54 см бўй билан туғилган. Туғруқ табиий йўл билан ўтган ва она ҳам, бола ҳам яхши ҳолатда экани айтилмоқда.

Янги туғилган Эмин оиладаги 13-фарзанд ҳисобланади. У Ларисанинг тўққизинчи ўғли бўлиб, унинг энг катта қизи ҳозир 25 ёшда.

Ларисанинг айтишича, у ўзи ҳам катта оилада улғайган. Унинг турмуш ўртоғи эса ёлғиз ўсган бўлса-да, вақт ўтиши билан катта оилага кўникиб кетган. Аёл, шунингдек, фарзандининг соғ-саломат туғилишида ёрдам берган шифокорларга миннатдорчилик билдирган.