Эрондаги намойишларда қурбонлар сони ортди

Эрон жануби-ғарбида жойлашган Чаҳормаҳал ва Бахтиёрий вилоятининг Лордегон шаҳрида намойишлар зўравонликка айланиб кетди. Тўқнашувлар оқибатида икки киши ҳалок бўлди, 30 га яқин киши жароҳатланди. Бу ҳақда Эроннинг «Fars» ахборот агентлиги хабар бермоқда.

Маълумотларга кўра, шаҳардаги тартибсизликлар полиция ва намойишчилар ўртасидаги кескин тўқнашувларга айланиб кетган. Ҳозирда ҳудудда хавфсизлик чоралари кучайтирилган.

Маълум қилинишича, кеча, 7 январь куни юз берган тартибсизликлар чоғида намойишчилар полиция ходимларига тош ота бошлаган. Намойишларда қуролланган шахслар гуруҳи ҳам иштирок этган бўлиб, улар ҳуқуқ-тартибот идоралари ходимларига қарата ўқ узган. Тўқнашувлар давомида бир нечта маъмурий биноларга, жумладан, туман ҳокимияти биносига зарар етган. 

Эслатиб ўтамиз, 5 январь куни Эронда давом этаётган кўча намойишларида камида 35 киши ҳалок бўлиб, 1200 дан ортиқ одам ҳибсга олинган эди. 

Маълумот учун, 2025 йил 29 декабрь куни Теҳрон марказида эрон риали курсининг кескин пасайиши сабаб савдогарлар норозилик намойишларини бошлаган. Намойишларнинг маркази Ислом Республикаси кўчаси бўлган. «Fars» агентлиги хабарига кўра, норозилик билдирган тадбиркорлар ҳамкасбларини ҳам ҳаракатга қўшилишга чақирган. 

30 декабрь куни норозиликларга Теҳрон университетлари талабалари ҳам қўшилган. “Меҳр” агентлиги хабарига кўра, 2 январь куни Илом вилояти кўчаларида ниқоб таққан, ўқотар қуролланган номаълум шахслар пайдо бўлган. Сўнгги кунларда, асосан, ғарбий вилоятларда намойишчилар ва ҳуқуқ-тартибот идоралари ўртасидаги қуролли тўқнашувлар сони ошгани қайд этилмоқда. 

4 январь куни куни Эрон полицияси раҳбари бундан буён тартибсизликларни уюштираётган шахсларга нисбатан қатъий чоралар кўрилишини, уларни аниқлаш ва қўлга олиш бўйича фаол ҳаракатлар олиб борилишини маълум қилган. Киберхавфсизлик ва интернет инфратузилмаси соҳасида фаолият юритувчи “Cloudflare” компанияси хабарига кўра, бу вақтда мамлакатда интернет сегментидаги трафик вақтинча чекланган.