Депутат парламент биносидан ўлик ҳолда топилди

Бугун, 19 август куни Финляндия парламентининг биносида депутат ўз жонига қасд қилди. Бу ҳақда “Iltalehti” нашри хабар берди.

Фавқулодда хизматларга ҳодиса ҳақида сигнал соат 11:06 да келиб тушган. Газета манбалари марҳум депутат бўлгани ҳақида айтмоқда, бироқ унинг исми ошкор қилинмаган. Парламент хавфсизлик хизмати раҳбари Ааро Тойвонен бу маълумотларни рад этмаган.

Полиция ҳодиса юзасидан текширув бошлаган. Ҳуқуқ-тартибот идоралари марҳумнинг ўлимида жиноят аломатлари йўқлигини қайд этган. Воқеа жойида бир неча полиция патруллари ва шифокорлар ишламоқда. 

“Коалиция” партияси фракцияси раиси Юкка Копра бу фожиани вазирларнинг ёзги йиғилиши чоғида журналистлардан эшитганини айтган. Унинг сўзларига кўра, вафот этган депутат қайси партиядан бўлгани унга номаълум. Сиёсатчи бу воқеани “ачинарли ва жиддий ҳодиса” деб атаган.

Парламентда ҳозирда ёзги таътил давом этмоқда. Кузги сессия 2 сентябрга белгиланган.