Тошкентда дарахт кесишга чеклов бекор қилиниши керак – Мурод Назаров

Тадбиркор Мурод Назаров Тошкент шаҳрида қурилиш қилаётганларга дарахт кесишга чеклов қўйиш нотўғри эканини айтди. Бу ҳақда у кеча, 17 июль куни Савдо-саноат палатасининг қурилиш соҳасига бағишланган йиғилишида сўз очди. 

Унинг айтишича, тадбиркорлар қурилиш жараёнига халал бергани учун айрим дарахтларни кесишга мажбур бўлмоқда.

“Тошкент шаҳри бош режасига тузатиш киритиляпти. Бундан буён пойтахтда қурилишлар ё реновация, ё реконструкция ҳудудларида бўлади. Табиийки, бўш жой йўқ. Ҳар бир бино атрофида дарахт бор. Дарахтларни ўйламасдан кесиб ташлашгани учун катта резонансга олиб келиб, мораторий қўйилганди. Лекин тан олиш керак, бу жойларда ҳатто реконструкция пайтида техникага дарахтлар халақит беради. Ва қандайдир йўллар билан барибир дарахтлар кесиляпти. Чеклов қўйиш керак эмас, чекловлар коррупцияни кучайтиради. Имтиёзларга ҳам қаршиман”, деган Назаров.

Мурод Назаров мазкур масалага ечим сифатида қурувчи компания зиммасига кесилган дарахтлар ўрнига янгиларини экишни юклаш кераклигини айтди.

“Ҳар бир қурувчи компания ёки бўлмаса учинчи шахс “дарахтлар банки” устида ишласин. Масалан, биз келаси ёки ундан кейинги йилда тахминан қанча қурилиш қилишимизни биламиз. Тахминан нечта дарахт кесилиши мумкинлигини ҳам ҳисоблаймиз. Олдиндан янги дарахтларни экиб қўяйлик. Эртага нечта дарахт кесишга тўғри келса, диаметри, кўрсаткичлари белгилаб қўйилсин. Керак бўлса, учинчи шахслар бу билан шуғуллансин. Чунки олдиндан дарахт экмаган компания бўлса, дарахтни учинчи шахсдан сотиб олсин. Натижада дарахт экишга ҳам инвестициядек қаралади. Масалан, Миробод туманида кесадиган бўлсак, янги экилган дарахтларни ўша туман балансига (кесилган дарахт ўрнига) ўтказиб қўяйлик. Чеклов бўлгандан кўра, шундай механизм яратайлик”, деди тадбиркор.

Маълумот учун, Ўзбекистонда дарахтларни ноқонуний кесиш ёки йўқ қилиш учун жавобгарлик белгиланган. Маъмурий жавобгарликка кўра, рухсатномасиз дарахт кесганлик учун жисмоний шахсларга 5 БҲМгача, мансабдор шахсларга 10 БҲМгача, юридик шахсларга эса 50 БҲМгача жарима солинади. Агар дарахт кесиш катта зарар етказса, гуруҳ бўлиб ёки Қизил китобга киритилган ўсимликларга нисбатан содир этилса, Жиноят кодексига мувофиқ 3 йилгача озодликдан маҳрум қилиш жазоси тайинланиши мумкин. Табиат муҳофазаси ҳудудларидаги дарахтларни кесиш учун жазо янада оғирроқ.