“Геноцидга томошабинмиз ва ҳеч нарса қилолмаяпмиз”. БМТ амалдори Фаластин учун истеъфога чиқди

Крэйг Мохибер БМТ Инсон ҳуқуқлари бўйича Олий комиссарлигининг Нью-Йоркдаги идораси директори лавозимидан истеъфога чиқди. Чунки у 30 йилдан ортиқ ишлаган жаҳон ташкилоти Исроил-Фаластин можаросини ҳал қилиш бўйича ўз вазифаларини бажара олмаяпти, деб ҳисоблайди. Бу ҳақда унинг БМТ Инсон ҳуқуқлари бўйича Олий комиссари Волькер Туркга йўллаган мактубида айтилади. 

“Бу БМТ Инсон ҳуқуқлари бўйича Олий комиссарлигининг Нью-Йоркдаги ваколатхонаси директори сифатида сиз билан сўнгги расмий мулоқотим. Биз яна бир бор кўз ўнгимизда геноцид содир бўлаётганига гувоҳ бўляпмиз ва биз ишлаётган ташкилот буни тўхтатишга ожиздир”, деб ёзган у. 

Унинг қайд этишича бу геноциднинг дарслик намунасидир. 

“Қўшма Штатлар, Буюк Британия ва Европанинг катта қисми ҳукуматлари даҳшатли ҳужумга тўлиқ шерик бўлишди. Бу ҳукуматлар нафақат Женева конвенциялари бўйича ўз мажбуриятларини бажаришдан бош тортмоқда, балки улар ҳужумларни қуроллантирмоқда, иқтисодий ва разведка ёрдамини кўрсатмоқда ва Исроил ваҳшийликларини сиёсий ва иқтисодий ҳимоя қилмоқда”, дейди истеъфога чиқаётган амалдор. 

Мохибернинг қайд этишича, сўнгги ўн йилликларда БМТнинг асосий тузилмалари ўз принциплари ва халқаро ҳуқуқдан узоқлашиб, Қўшма Штатлар кучига, шунингдек, Исроил лоббиси қўрқувига бўйсунган. 

“Инсон ҳуқуқлари умумжаҳон декларацияси “Ал-Накба” (Фаластинликлар 1948 йил 14 майда Исроил давлати эълон қилинганидан кейин 15 май куни “Фалокат куни”ни нишонлайдилар) билан бир йилда қабул қилингани ҳайратланарли тарихий киноядир. 

Тинчлик режаси

Расмий 10 банддан иборат режани таклиф қилди, унинг амалга оширилиши, унинг фикрича, БМТга Фаластин-Исроил можаросини ҳал қилишда ёрдам бериши мумкин. Булар бутун тарихий Фаластинда насронийлар, мусулмонлар, яҳудийлар учун тенг ҳуқуқли ягона демократик, дунёвий давлат яратишни қўллаб-қувватлаш ва тинч аҳолини ҳимоя қилиш учун БМТ мандатига эга бўлган яхши жиҳозланган кучларни жойлаштиришни ўз ичига олади.

Мохибернинг фикрича, БМТ Исроилнинг йирик ядровий, кимёвий ва биологик қурол арсеналларини йўқ қилиш тарафдори бўлиши, Америка Қўшма Штатлари ва бошқа Ғарб давлатлари ишончли воситачилар эмаслиги ҳамда можаронинг анча фаол томонлари ва Фаластин аҳолисининг ҳуқуқларини бузишда Исроил билан шерик эканлигини тан олиши керак. 

“Биз бу шунчаки ер ёки дин бўйича икки томонлама зиддият деб даъво қилишни бас қилишимиз ва номутаносиб равишда кучлироқ давлатнинг маҳаллий аҳолини миллатига кўра мустамлака қилиш, қувғин қилиш ва эгаллаб олиш ҳақиқатини тан олишимиз керак”, дейилади мактубда.

Унинг билдиришича, бунга эришиш учун йиллар керак бўлади ва Ғарб давлатлари бу борада ҳар қадамда қаршилик кўрсатади.

“Қисқа муддатда биз зудлик билан ўт очишни тўхтатиш, шунингдек, Ғазонинг ўнлаб йиллар давом этган қамалини тўхтатиш, Ғазо, Қуддус ва Ғарбий Соҳилда этник тозалашга қарши курашишимиз, Ғазога геноцид ҳужумини ҳужжатлаштириш, фаластинликларга катта миқдордаги гуманитар ёрдам ва реконструкция ресурсларини етказиб беришга ёрдам бериш, жароҳатланган ҳамкасблар ва уларнинг оилаларига ғамхўрлик қилиш ва БМТ сиёсий тузилмаларида принципларга асосланган ёндашув учун тиш ва тирноқ билан курашишимиз керак”, дейди Мохибер.

Мактуби охирида Мохибер БМТнинг Фаластин масаласида мағлубиятга учрагани жаҳон ташкилотининг бу масаладан узоқлашишига сабаб бўлмаслиги кераклигини айтган. 

“Дунё бизга қарайди, бу тарихий лаҳзада қайси томонда эканлигимиз учун барчамиз жавобгар бўламиз. Келинг, адолат тарафини танлайлик”,дея хулоса қилган у.