Афғонистонда «Толибон» ва қаршилик кучлари ўртасида жанглар бўлмоқда

15 октябрь, жума куни эрталабдан буён Афғонистон шимоли-шарқидаги Балх вилоятининг Андароб водийсида жанговар тўқнашувлар давом этмоқда, деб ёзади «Интерфакс» «Толибон»га қарши Миллий фронтга яқин манбаларига таяниб.

«Айни пайтда Андаробда толиблар ва Миллий қаршилик фронти ўртасида шиддатли жанг бормоқда. Иккала томонда ҳам қурбонлар бор, уларнинг аниқ сони маълум эмас», — дейилади Twitter’га жойланган хабарда.

Манбалар берган маълумотларга кўра, жанговар тўқнашувлар Бағлон вилоятининг Пули Ҳисор ва Дих-Салоҳ уездларида бормоқда, «Толибон» 60 ортиқ одамини йўқотиб чекинган. Фронт жангчилари орасида ҳам қурбонлар бор, хусусан, икки нафар дала қўмондони вафот этгани айтилмоқда.

«Толибон» ҳодиса юзасидан изоҳ берганича йўқ, аммо ижтимоий тармоқларга жойланган видеода толиблар карвони Андароб водийсига қараб кетаётганини кўриш мумкин.

Бу орада «Толибон» Мудофаа вазирлиги Twitter’да маълум қилишича, Атоулла Умарий «Мозори Шариф» корпуси қўмондони этиб тайинланган. Корпус штаби Афғонистон миллий армиясининг собиқ 209-сонли «Шоҳин» корпуси базасига жойлашган, у Балх вилояти маркази Мозори Шариф шаҳри ташқарисида бўлиб, мамлакат шимолидаги хавфсизлик учун жавобгар бўлган.