Наманганда 500 дан ортиқ реклама баннерлари олиб ташлангани сабабларига аниқлик киритилди

Ижтимоий тармоқларда Наманганда ўзбек тилида, лотин ёзувида бўлмаган реклама баннерлари олиб ташланаётгани ҳақида хабарлар тарқалди.

«Дарё» мухбири Азизбек Абдувалиевнинг аниқлик киритишича, 2020 йил 12—15- январь кунлари Наманган шаҳри, Учқўрғон, Уйчи, Чуст, Поп ва Янгиқўрғон туманларида «Реклама тўғрисида»ги қонун ҳамда Вазирлар Маҳкамасининг «Ташқи реклама бозорини тартибга солиш тўғрисида»ги қарори ижросини таъминлаш мақсадида ишчи гуруҳ томонидан ўрганишлар олиб борилган.

Ишчи гуруҳ таркибига тил бўйича маслаҳатчилар, Монополияга қарши курашиш қўмитасининг ҳудудий бошқармаси мутахассислари ва маҳаллий ҳокимликлар вакиллари киритилган.

— Ўрганишлар давомида «Реклама тўғрисида»ги қонун талаблари ва давлат тили меъёрларига жавоб бермайдиган 586 та реклама баннерлари олиб ташланди. Уларнинг аксарияти йўлларга, тротуарларга ўрнатилган, панжаралар, ҳатто дарахтларга михланган. Бу нафақат реклама қонунчилиги, балки экология талабларининг ҳам бузилиши ҳисобланади. Уларнинг тил меъёрларига тўғри келмаслиги, орфографик хатоларга тўла эканлиги ҳақида гапирмаса ҳам бўлади. Шундай экан, ўзбек тилида, лотин ёзувида бўлмаган реклама баннерлари олиб ташлангани ҳақида тарқатилган хабарлар ҳақиқатга тўғри келмайди, — дейди вилоят ҳокимининг давлат тили тўғрисидаги қонун ҳужжатларига риоя этилишини таъминлаш масалалари бўйича маслаҳатчиси Улуғбек Шерматов.

Шерматовнинг айтишича, ўрганишлар давомида яна 274 та ҳолатда рекламаларнинг давлат тилида, лотин алифбосида тўғри ёзилиши бўйича тушунчалар ҳам берилиб, огоҳлантириш хатлари тақдим этилган.