Месси Испания клубини сотиб олди

Саккиз карра “Олтин тўп” соҳиби Лионель Месси Испаниянинг иккинчи дивизонида иштирок этаётган “Эльденсе” клубини сотиб олиш бўйича принципиал келишувга эришди. Бу ҳақда “Marca” хабар берди.

Манбага кўра, аргентиналик футболчи клубнинг амалдаги эгалари билан келишувга эришган ва учинчи томонлар иштирокисиз “Эльденсе” акцияларининг 100 фоизини сотиб олиши кутилмоқда. Бироқ битимни расмийлаштириш учун ҳуқуқий ва шартномавий жараёнлар, жумладан, молиявий текширувдан ўтиш талаб этилади. Шунингдек, келишув Испания Олий спорт кенгаши (CSD) томонидан тасдиқланиши керак.

Месси 2026 йилда Испания футболидаги иккинчи клубини сотиб олиши мумкин. Жорий йилнинг апрель ойида унинг Каталонияда жойлашган “Корнелья” клубини харид қилгани маълум бўлган эди. “Эльденсе” эса Аликанте вилоятининг Эльда шаҳрида жойлашган. 

“Marca”нинг қайд этишича, Месси фаол футболчилик фаолиятини якунлаганидан кейин Каталония яқинида яшашни режалаштирмоқда.

Маълумот учун, 39 ёшли Месси 2023 йилдан буён “Интер Майами” сафида тўп тепмоқда. У Европадаги фаолияти давомида “Барселона” ва “Пари Сен-Жермен” клубларида ўйнаган. Аргентиналик футболчи “Барселона” билан Чемпионлар лигасида тўрт марта, UEFA Суперкубогида уч марта ва клублар ўртасидаги жаҳон чемпионатида уч марта ғолиб чиққан.

Месси Аргентина терма жамоаси билан 2022 йилги Жаҳон чемпионатида ғолиб бўлган, шунингдек, 2014 ва 2026 йилги мундиалларда финалга чиққан. У 2008 йил Олимпиада чемпиони ва 2021 ҳамда 2024 йилги Америка кубоги ғолиби ҳисобланади.

Аргентиналик футболчи миллий терма жамоа сафида 207 та учрашув ўтказиб, 125 та гол урган. У ҳар икки кўрсаткич бўйича Аргентина терма жамоаси рекордини ўрнатган. Месси 2026 йилги Жаҳон чемпионатидан сўнг терма жамоадаги фаолиятини якунлаган.