Ўзбекистонлик боксчи АҚШдан депортация қилинди

Ўзбекистонлик профессионал боксчи Қудратилло Абдуқаҳҳоров АҚШда иммиграция қоидалари билан боғлиқ ҳолат сабаб ҳибсга олиниб, кейинчалик мамлакатдан депортация қилинган. Бу ҳақда “Fighting Styles” нашри хабар берди.

Қайд этилишича, Абдуқаҳҳоров 2026 йил 21 март куни Жанубий Калифорнияда ўтказилган ProBox бокс оқшомида Жошуа Кевин Антонга қарши рингга чиққан ва биринчи раундда техник нокаут билан мағлуб бўлган. Биринчи раунд якунланганидан сўнг ўзини ёмон ҳис қилган ўзбекистонлик боксчи бош қисмини ушлаб, кучли оғриқ сезаётганини кўрсатган. Шундан кейин жангни давом эттирмасликка қарор қилинган.

Жангдан кейин Абдуқаҳҳоров Лос-Анжелесдан ўзи доимий яшаб, ишлаб келган Пенсильванияга йўл олган. Боксчининг айтишича, уни автомобилда олиб кетаётган таниши билан бирга тегишли ҳужжатлар ва амал қилувчи визаларга эга бўлмаган.

Абдуқаҳҳоровнинг сўзларига кўра, йўлга чиққанидан 5-6 кун ўтиб полиция уларни тўхтатган ва боксчи ҳибсга олинган. Кейинчалик у АҚШ Иммиграция ва божхона полицияси (ICE) назоратига ўтказилиб, Вайоминг штатидаги Sweetwater County Jail ҳибсхонасига жўнатилган.

Ўзбекистонлик боксчи у ерда 45 кун сақланганини айтган. Унинг таъкидлашича, 25 минг доллар миқдорида гаров пули тўланганига қарамай, адвокат ёрдамидан тахминан бир ой фойдалана олган, кейин эса адвокати билан алоқа узилган. Шунингдек, ҳибсда бўлган даврида интернетдан фойдаланиш имконияти бўлмаган.

Абдуқаҳҳоров ҳибсда унга нисбатан зўравонлик ёки бошқа турдаги тазйиқ ўтказилганини даъво қилмаган. Бироқ у профессионал боксда бир қатор нуфузли камарларни қўлга киритган спортчи сифатида бундай вазиятга тушиб қолиш ўзи учун кутилмаган бўлганини билдирган.

Манбага кўра, Абдуқаҳҳоров ва унинг менежери Кике Маганья ўртасида молиявий келишмовчилик юзага келган. Боксчи менежерини жорий йилнинг 21 мартидаги жанги учун белгиланган гонорарни унга бермаганликда айблаган. Маганья эса бу айбловларни рад этган. У нашрга Zelle орқали Абдуқаҳҳоровга амалга оширилган бир нечта тўловларни тасдиқловчи скриншотларни тақдим этганини айтган. Менежернинг таъкидлашича, гонорардан солиқлар ва бошқа мажбурий тўловлар ушлаб қолинганидан кейин пул боксчининг ҳисоб рақамига ўтказилган. Абдуқаҳҳоров эса пулни олмаганини таъкидламоқда.

Маганья, шунингдек, Абдуқаҳҳоровнинг АҚШда ишлаш учун визаси бўлгани, аммо унинг амал қилиш муддати тугаганини маълум қилган. Менежернинг сўзларига кўра, у боксчига Ўзбекистонга қайтиб, ҳужжатларини тартибга келтиришни тавсия қилган. Бироқ Абдуқаҳҳоров АҚШда қолиб, DoorDash ҳайдовчиси сифатида ишлашда давом этган. Кейинчалик у ҳибсга олиниб, АҚШдан депортация қилинган.

Айни пайтда Абдуқаҳҳоров ва унинг менежери ўртасидаги молиявий низо ҳал этилмаган. “Fighting Styles” маълумотига кўра, ҳозирча ушбу масала бўйича суд жараёни ҳам бошланмаган.

Маълум қилинишича, Абдуқаҳҳоров ҳозир Ўзбекистонда, оиласи билан Андижонда истиқомат қилмоқда. У машғулотларни давом эттириб, навбатдаги жанг учун рақиб изламоқда.

Нашрнинг ёзишича, мажбурий депортация сабаб Абдуқаҳҳоров ҳозирча АҚШга қайта олмайди. Унинг мамлакатга қонуний равишда қайтиши учун камида бир йил кутишига тўғри келиши мумкин, бироқ бу муддат узоқроқ бўлиши ҳам эҳтимолдан холи эмас.