Путин Россия ҳарбий қўмондонлиги таркибини янгилади

Россия Президенти Владимир Путин мамлакат ҳарбий қўмондонлиги таркибида бир қатор йирик кадрлар алмашинувини амалга оширди. Бу ҳақда “The Moscow Times” хабар берди.

Хусусан, янги ташкил этилаётган Учувчисиз тизимлар қўшинларига генерал-полковник Денис Лямин раҳбар этиб тайинланган.

Қайд этилишича, Лямин шу пайтгача “Марказ” қўшинлар гуруҳи штаби бошлиғи лавозимида ишлаган. У 2023 йилда Мудофаа вазирлиги раҳбариятини танқид қилгани ортидан лавозимидан олинган генерал Иван Попов ўрнига 58-армияга қўмондон этиб тайинлангани билан танилган. Кейинчалик Попов фирибгарлик айблови билан 5 йилга озодликдан маҳрум этилган.

Учувчисиз тизимлар қўшинлари – бу қуролли кучларнинг янги бўлинмаси ҳисобланади. Россия Мудофаа вазирлиги 2025 йил декабрь ойида уни шакллантириш ишлари якунлангани ҳақида ҳисобот берган. Бироқ Путин йиғилишда бу жараён ҳали тўлиқ якунланмаганини тан олиб, янги қўмондоннинг асосий вазифаларидан бири мазкур қўшин турини тўлиқ шакллантириш бўлишини айтган.

Шунингдек, Валерий Солодчук Бирлашган таъминот хизмати раҳбари этиб тайинланган. У бунгача “Марказ” қўшинлар гуруҳига қўмондонлик қилган. Солодчук 2022 йилда Киев вилоятининг Буча шаҳрида тинч аҳолининг ўлдирилишига алоқадорликда айбланган.

Бундан ташқари, Андрей Иванаев “Марказ” қўшинлар гуруҳи қўмондони этиб тайинланган. У аввал “Шарқ” қўшинлар гуруҳини бошқарган. “Шарқ” қўшинлар гуруҳи раҳбари вазифасини эса генерал-майор Пётр Болгарев вақтинча бажарадиган бўлган.

“Бизда Мудофаа вазирлиги тузилмасини махсус ҳарбий операция эҳтиёжлари ва тажрибасидан келиб чиқиб такомиллаштириш ишлари давом этмоқда”, деган Путин ушбу тайинловларга изоҳ берар экан.

Путин бундан буён Мудофаа вазирлигининг барча логистика хизматлари 2025 йил ноябрь ойидан бошлаб генерал-полковник Александр Санчик бошчилигида бирлаштирилган логистика хизматларига ўхшаш “битта позицияда жамланишини” эълон қилган. Санчикнинг вазифалари ҳам ўзгарган. У энди қурол-яроғ, ҳарбий ва махсус техника буюртмаларини ташкил қилиш ҳамда қўшинларни техник қўллаб-қувватлаш учун жавобгар бўлади.