“100 мингга яқин қурбон”. Венесуэлада даҳшатли зилзила бўлди

24 июнь куни Венесуэланинг шимолий ва марказий ҳудудларида иккита кучли зилзила содир бўлди. Оқибатда мамлакат пойтахти Каракас шаҳрида турар жой бинолари ва бошқа иншоотлар қулаб тушган. Бу ҳақда “Tagesschau” хабар берди.

Венесуэла Ички ишлар вазирлиги маълумотига кўра, зилзилалар оқибатида Каракасда бир қатор бинолар вайрон бўлган. Мамлакатнинг вақтинча президенти Делси Родригес мамлакат бўйлаб фавқулодда ҳолат эълон қилган АҚШ Геология хизмати эса табиий офат оқибатида қурбонлар сони 10 мингдан 100 минг нафаргача етиши мумкинлиги ҳақида прогноз берган. Айни пайтда Венесуэла расмийлари ҳалок бўлганлар сони ҳақида маълумот бермаган.

“Reuters” агентлигининг хабар қилишича, аввал магнитудаси 7,2 бўлган зилзила қайд этилган. Ундан бир дақиқадан ҳам кам вақт ўтиб, магнитудаси 7,5 бўлган иккинчи зилзила содир бўлган.

Биринчи зилзиланинг эпицентри Кариб денгизи соҳилида жойлашган Морон шаҳридан 28 километр ғарбда, Каракасдан эса тахминан 168 километр узоқликда бўлган. Зилзила ўчоғи 13 километр чуқурликда жойлашган.

Иккинчи зилзиланинг эпицентри Морондан 16 километр узоқликда, ўчоғи эса 10 километр чуқурликда қайд этилган.

Венесуэла Ички ишлар вазири Диосдадо Кабельонинг айтишича, ёнғин-қутқарув хизмати ва полиция вайронагарчилик оқибатларини бартараф этиш учун барча имкониятлардан фойдаланмоқда. У ҳалок бўлганлар ва жабрланганлар оилаларига ҳамдардлик билдирган.

Маълум қилинишича, Каракасдаги кўплаб аҳоли биноларнинг мустаҳкамлигига ишонч қолмагани сабабли уларни тарк этган. Кўчаларда қулаб тушган деворлар ортидан уй жиҳозлари кўриниб қолгани одамларни қаттиқ саросимага солган.

Ижтимоий тармоқларда Каракас аэропорти ва Кариб денгизи соҳилидаги Ла-Гуайра портидаги вайрона ҳолатлар акс этган видеолар тарқалган. Кейинчалик Делси Родригес аэропорт зилзила сабаб ёпилганини тасдиқлаган.

Унинг маълум қилишича, иккита кучли зилзиладан кейин яна 20 та афтершок кузатилган. Венесуэла парламенти 25 июнга белгиланган ялпи мажлисни бекор қилган.

АҚШнинг цунами огоҳлантириш маркази дастлаб Пуэрто-Рико, Виргин ороллари ҳамда Венесуэла соҳиллари яқинидаги Аруба, Кюрасао ва Бонайре ороллари учун цунами хавфи ҳақида огоҳлантириш берган. Бироқ тахминан бир соатдан сўнг бу огоҳлантириш бекор қилинган.

Маълумот учун, Венесуэла Кариб ва Жанубий Америка тектоник плиталарининг туташган қисмида жойлашган бўлиб, сейсмик фаол ҳудуд ҳисобланади.

Шунингдек, 25 июнь кунига ўтар кечаси Япониянинг Хонсю ороли шимоли-шарқий соҳиллари яқинида ҳам магнитудаси 7,2 бўлган зилзила содир бўлди. Зилзила эпицентри Аомори префектурасидаги Хатинохе шаҳридан 67 километр жануби-шарқда жойлашган.

АҚШ Геология хизмати ушбу зилзиланинг магнитудасини 6,9 деб баҳолаган. Ҳозирча жабрланганлар ҳақида расмий маълумот берилмаган.