Россиялик генерални ўлдиришда гумонланган ўзбекистонлик умрбод қамалди

Россиянинг 2-Ғарбий округ ҳарбий суди судьялари ҳайъати генерал-лейтенант Игорь Кириллов ҳалок бўлган терактни содир этганликда айбланган Аҳмад Қурбоновга умрбод озодликдан маҳрум этиш жазоси тайинлади. Шунингдек, унга 1 млн рубль миқдорида жарима белгиланди. Бу ҳақда РБК хабар берди.

Нашрга кўра, портловчи моддани етказиб берган Озарбайжон фуқароси Роберт Сафарян 25 йилга қатъий тартибли колонияга ҳукм қилинган, шундан дастлабки 9 йилини қамоқхонада ўтайди. Қурбоновга тураржой ижарага берган Ингушетия фуқаролари Батуҳан Точиев ва Рамазон Падиевга мос равишда 22 йил (дастлабки 8 йили қамоқхонада) ва 18 йил (дастлабки 6 йили қамоқхонада) озодликдан маҳрум қилиш жазоси, шунингдек 200 минг рубль миқдорида жарима тайинланган.

Айбланувчиларга иш доирасида ўз ролларига қараб террорчилик ҳамжамиятини ташкил этиш ва унда иштирок этиш, терактни тайёрлаш, шунингдек портловчи моддаларни ноқонуний айлантириш ва портловчи қурилма ясаш айбловлари қўйилган. Суд мунозаралари чоғида прокурор Надежда Тихонова Қурбоновни умрбод қамоқ жазосига, Сафарянни 28 йилга, Точиевни 26 йилга, Падиевни эса 24 йилга қатъий тартибли колонияга ҳукм қилишни сўраган.

Нашрга кўра, Қурбонов айбини тан олиб, тергов билан фаол ҳамкорлик қилган. Бошқа айбланувчилар эса Қурбоновнинг террорчилик фаолиятига алоқадорлигини билмаганини маълум қилган. Точиев ва Падиев судда фақат квартирани ижарага бериш билан шуғулланганини айтган, Сафарян эса у етказган почтада нима борлигидан бехабар бўлганини билдирган.

Тергов версиясига кўра, 2024 йил 17 декабрь куни Ўзбекистон фуқароси Қурбонов Украина Хавфсизлик хизмати (УХХ) топшириғига биноан генерал Кириллов яшаган уйнинг кириш қисмига рулида масофадан бошқариладиган бомба ўрнатилган электро-самокатни қолдирган. Шундан сўнг теракт ижрочиси ижарага олинган автомобилга ўтириб, бўлаётган воқеаларни Украинага жонли эфирда узатган. Генерал Игорь Кириллов ва унинг ёрдамчиси майор Илья Поликарпов уйидан чиққан пайтда портлаш содир бўлиб, икки зобит ҳам ҳалок бўлган.

Россия Тергов қўмитаси маълумотига кўра, ҳарбий хизматчиларни портлатиб ўлдиргани учун Қурбоновга 100 минг доллар, янги ҳужжатлар ва Европа Иттифоқи давлатларидан бирида яшаш учун рухсатнома ваъда қилинган. Бироқ у бу мукофотни олмаган,, чунки портлашдан бир неча соат ўтиб қўлга олинган. Шундан сўнг Владимир шаҳрида Сафарян ҳам қўлга олинган. Тергов иддаосига кўра, у Польшадан олиб келинган бомбани Қурбоновга топширган. Дастлаб унга фақат портловчи моддаларни ноқонуний айлантириш айби қўйилган, бироқ Москвага олиб келингач, терактда иштирок этганлик бўйича ҳам айблов қўйилган. Кейинроқ, 2025 йил январида Батуҳан Точиев ва Рамазон Падиев ҳам ҳибсга олинган. Иш материалларига кўра, улар Қурбоновни портлашдан кейин яшириниши учун квартира билан таъминлаган.

Россия тергови маълумотларига кўра, УХХ теракт тайёргарлигини USDT стейблкоинлари (муайян валюта курсига боғланган криптоактивлар) орқали молиялаштирган. Дастлабки босқичда Қурбонов 5 минг USDT олган. 2024 йилда бу 404,8 минг рублга тенг бўлган.

Терговнинг аниқлашича, рус тилини деярли билмайдиган Ўзбекистон фуқароси аввал Тошкентдан Баку шаҳрига, кейин Остона орқали Москвага йўл олган. Пойтахтда у криптовалюта орқали яна 431 минг рубль олган. Умуман олганда, Тергов қўмитаси ҳисоб-китобига кўра, терактни ташкил этишга тахминан 842 минг рубль сарфланган. 27 та квартира ва 13 та автомобиль эгаларига етказилган моддий зарар 3,3 млн рублга баҳоланган.

2-Ғарбий ҳарбий суддаги суд жараёни ўтган йилнинг 5 ноябрида бошланган ва ёпиқ тартибда ўтказилган. Жараён ёпилишидан аввал суд раиси Ички ишлар вазирлигидан келган хабарни ўқиб эшиттирган. Унда дастлабки тергов босқичида “жиноятни оқлашга қаратилган провокацион ҳаракатлар мунтазам содир этилгани” қайд этилган. Шунингдек, вазирлик маълумотига кўра, “махсус ҳарбий операция ўтказилишига қарши бўлган шахслар” суд мажлисларида қатнашиб, уларни “УХХ назоратидаги медиаресурсларда” ёритишни режалаштирган. Шу сабабли прокурор Надежда Тихонова жараённи ОАВ ва тингловчилар учун ёпишни сўраган, айбланувчиларнинг адвокатлари эса бу илтимосга қарши чиқмаган.