1 сентябрдан нималар ўзгаради?

Ўзбекистонда 2025 йил 1 сентябрдан эътиборан қонунчиликда бир қанча ўзгаришлар амалга ошади.

Мактаб ва боғча директорларининг маоши оширилади

Собиқ мактабгача ва мактаб таълими вазири Ҳилола Умарова жорий йилнинг март ойида Президентнинг тегишли фармони билан мактаб директорлари ва уларнинг ўринбосарлари ҳамда мактабгача таълим ташкилоти директорлари иш ҳақи миқдорлари оширилишини маълум қилганди. 

• 2025 йил 1 сентябрдан бошлаб умумий ўрта таълим ташкилотлари директори лавозимининг базавий тариф ставкаси 20 фоизга, ўринбосари лавозимининг базавий тариф ставкаси 15 фоизга оширилиб, боғчаларимиз директорлари лавозимларининг базавий тариф ставкалари III ва IV гуруҳдаги умумий ўрта таълим ташкилоти директори ўринбосари лавозимининг базавий тариф ставкаларига тенглаштириш орқали оширилади. Республикадаги 10 мингдан ортиқ мактаб директорлари, 7 мингга яқин боғча директорлари ҳамда 35 мингга яқин мактаб директор ўринбосарларининг иш ҳақи миқдорлари оширилади.
• 2026 йил 1 январдан бошлаб умумий ўрта таълим ташкилотларининг директор жамғармаси маблағлари ҳисобидан директор ва унинг ўринбосарларига фаолият самарадорлиги кўрсаткичлари (KPI) натижасига кўра базавий тариф ставкаларига нисбатан тегишлича 20 ва 10 фоиз миқдорида ҳар ойлик устамалар белгиланади.

Шунингдек, туман бўлимларида қўшимча штатлар ажратилмоқда ва бу ўқувчилар билимини баҳолашни мониторинг қилиш, ўқувчиларга хорижий тил ва касбга ўргатиш вазифаларини амалга ошириш учун тегишли лавозимларни жорий этиш имкониятини яратади. Бундан ташқари, ҳудудий бўлинмалар ходимларингнинг кўп йиллик хизмати учун рағбатлантириш жорий этилмоқда (Вазирлик тизимидаги қарийб 15 минг нафар бошқарув ходимларига кўп йиллик хизмати учун рағбатлантириш тизими йўлга қўйилади).

Шу билан бирга, мактаб ходимлари мукофот пули миқдорини меҳнатга ҳақ тўлашнинг энг кам миқдорининг 75 фоизигача (амалда 50 фоизгача) миқдорида этиб белгиланмоқда.

Давлат хизматчиларининг ижтимоий тармоқлардаги саҳифалари бўйича маълумотлар базаси яратилади

Жорий йил 1 сентябрдан бошлаб давлат хизматчиларининг ўз кўникмаларини доимий ривожлантириб бориши ҳамда улар ўртасида ўзаро мулоқотни кучайтириш бўйича қуйидаги имкониятларни назарда тутувчи “Давлат хизматчиси” мобил иловаси ишга туширилади:

• масофавий тарзда давлат хизматчиларининг компетенцияларини ривожлантириш ва малакасини ошириш ҳамда бу борада статистик маълумотларни шакллантириш;
• давлат хизматчилари томонидан давлат органи иш фаолиятини такомиллаштириш юзасидан ташаббуслар бериш ҳамда раҳбар томонидан уларга муносабат билдириш;
• давлат хизматчисининг шахсий ривожланиш режасини тузиш, унинг бажарилишини мониторинг қилиш;
• ходим тўғрисидаги маълумотлар, раҳбар ходимлар учун улар томонидан мувофиқлаштириладиган соҳа ва бўлинмалар, боғланиш учун телефон рақами, почтаси ва ижтимоий тармоқлардаги саҳифалари ҳақидаги ахборотларни назарда тутувчи маълумотлар базасини яратиш. 

Айрим талабаларнинг ТТЖдаги яшаш харажатлари қоплаб берилади

2025/2026 ўқув йилидан камбағал оилалар фарзандларининг давлат ОТМ талабалар тураржойларидаги яшаш харажатлари Давлат бюджети ҳисобидан қоплаб берилади. Бу ҳақда “Камбағалликдан фаровонлик сари” дастурини амалга ошириш бўйича биринчи навбатдаги чора-тадбирлар тўғрисида”ги Президент қарорида сўз боради.

Ўзбекистонликлар Иорданияга визасиз бора олади

Ўзбекистон фуқаролари жорий йилнинг 25 сентябридан бошлаб Иорданияга визасиз бориши мумкин бўлади. Буни Ўзбекистон Ташқи ишлар вазирлиги матбуот котиби Аҳрор Бурхонов тасдиқлади. 

Унинг аниқлик киритишича, Ўзбекистон ва Иордания ўртасида визасиз режимни жорий этиш тўғрисидаги битим имзоланганидан 30 кун ўтиб, яъни 25 сентябрдан кучга киради. Ўзбекистонликлар Иорданияда 30 кунгача визасиз қолиши мумкин бўлади.

Маълумки, 26 август куни Ўзбекистон Президенти Шавкат Мирзиёев ва Иордания подшоҳи Абдулла II ибн ал-Ҳусайннинг Самарқандда бўлиб ўтган музокаралари натижасида томонлар ўзаро равишда кириш визаси талабидан озод қилиш тўғрисида келишувга эришган.