Британияда гапирадиган тўти наркосавдогарларни тутишда полицияга ёрдам берди

Буюк Британияда гапирадиган тўти полицияга наркобанда фаолиятини фош қилишда ёрдам берди. Бу ҳақда “Daily Mail” хабар берди.

“Манго” лақабли ушбу тўти наркотик савдогарлари етакчисининг танишига тегишли бўлган. У жиноятчилар наркотик савдосида ишлатадиган ибораларни, жумладан “икки дона 25 га” деган сўз бирикмасини ёд олган.

Полиция Блэкпул шаҳрида рейд ўтказиб, катта миқдорда героин ва кокаин мусодара қилган. Шу билан бирга, улар тўтини ҳам топган. Суриштирувлар давомида аниқланишича, 35 ёшли Адам Гарнетт 2023 йилдан 2024 йилгача қамоқдан туриб бутун жиноят тармоғини бошқарган. Унинг телефонида наркотик моддалар акс этган видеолар ва тўтининг наркотикдан тушган пуллар билан ўйнаётгани ҳамда махсус ибораларни айтаётгани ёзиб олинган видеолар топилган.

Натижада ушбу тўдага алоқадор жами 15 нафар одам судга тортилган. Гарнеттга 19,5 йил қамоқ жазоси қўшилган. Тўти эгаси – Гарнеттнинг танишига эса 12 йил берилган. Икки нафар шерик судга келмаган, шунинг учун уларга нисбатан қидирув эълон қилинган. Тўтига эса қандай “жазо” берилгани номаълум.

Қайд этиш жоиз, АҚШда ҳам шунга ўхшаш ҳолат бўлиб ўтган эди. Гапирадиган тўти жиноят ишининг фош этилишига сабаб бўлган. 2015 йилда аёл уйида эрини отиб ўлдирган ва сўнгра ўзини ҳам ўлдирилгандек қилиб кўрсатишга уринган. Лекин тўти айтилган гапларни ёдлаб, терговчиларга муҳим далилни етказиб берган.