Андижонда инспекторни пичоқлаб ўлдирган шахс ушланди (видео)

1 июль куни Андижон вилояти Хўжаобод туманида профилактика инспектори чақирув вақтида пичоқланган ва олган жароҳати оқибатида вафот этган эди. Инспекторни пичоқлаган 65 ёшли фуқаро эса қочиб кетганди. Бугун, 4 июль куни мазкур фуқаро қабристонга яширингани аниқланди. Бу ҳақда Ички ишлар вазирлиги матбуот котиби Шоҳруҳ Ғиёсов маълум қилди.

Билдирилишича, гумонланувчи Юнусали Холбозоров бугун, 4 июль куни соат тахминан 06:30 ларда Хўжаобод туманида жойлашган “Юксалиш” маҳалласи “Сўқолоқ“ қабристонидаги маккапоя ичида яшириниб ётгани аниқланган, қўлга олиш жараёнида у ўзининг қорин қисмига пичоқ билан жароҳат етказган ҳамда биринчи тез тиббий ёрдам кўрсатилиб, шифохонага олиб борилган.

Ҳозирда мазкур ҳолат юзасидан Ўзбекистон Республикаси Жиноят кодексининг 97-моддаси (Қасддан одам ўлдириш) 2-қисми “г” банди билан жиноят иши қўзғатилган ҳамда тергов ҳаракатлари олиб борилмоқда.

“Жиноятчини қўлга олишда кўмаклашган фуқароларга Ички ишлар вазирлиги номидан миннатдорчилик билдирамиз”, дейилади хабарда.