Диогу Жота аварияда ҳалок бўлди – ОАВ

Португалиялик футболчи, Англиянинг “Ливерпуль” жамоаси аъзоси Диогу Жота бугун, 3 июль куни эрталаб 28 ёшида Испаниянинг Самора вилоятида содир бўлган йўл транспорт ҳодисасида вафот этди. Бу ҳақда “Marca” нашри хабар берди.

Маълум қилинишича, бахтсиз ҳодиса А-52 трассасининг 65-чақиримида, Паласьос-де-Санабрия муниципалитети яқинида содир бўлган. Жота ўзининг 26 ёшли укаси Андре билан бирга ҳаракатланаётган автомобил йўлдан чиқиб кетган ва ёнғин келиб чиққан.

Маълумотларга кўра, футболчи жорий йилнинг 22 июнь куни турмуш қурган.

Маълумот учун, Жота “Ливерпуль”га 2020 йили “Вулверхэмптон”дан 44,7 миллион евро эвазига ўтган. У Мерсисайд жамоаси билан Англия чемпионати ва Кубогини, шунингдек, икки марта Англия лига кубогини қўлга киритган. У шунингдек, Португалиянинг “Порту” ва Испаниянинг “Атлетико” жамоаларида ҳам тўп сурган. Португалия терма жамоаси сафида Жота 49 та ўйинда иштирок этган ва 14 та гол урган. У икки бор Миллатлар лигасида ғолиб чиққан.