Бой руслар хитойлик энагаларни ёлламоқда – NYT

Рус бойлари хитой тилида сўзлашувчи энагаларни ёллашмоқда. Улар рус элита оилалари орасида талаб катта бўлган инглиз тилида сўзлашувчи энагалардан кейин иккинчи ўринни эгаллаб, француз тилида сўзлашувчиларни четга суриб қўйди. Бу ҳақда 30 июнь куни энагалик хизматларини кўрсатувчи English Nanny компанияси асосчиси Валентин Гоголга таяниб, “The New York Times” (NYT) ёзди.

NYT'га берган интервьюсида Гогол хитой тилида гаплашадиган энагаларга бўлган талабни қондириш учун қўлидан келганича ҳаракат қилаётганини ва уларнинг маоши ойига 5000 долларга етганини айтди. Унинг сўзларига кўра, English Nanny мижозлари энди хитой тилини инглиз тилини тўлдирувчи иккинчи чет тили деб билишади.

“Бу Россияни хитойлаштириш жараёнининг фақат бир жиҳати”, дея таъкидлайди NYT.

Шунингдек, россиялик талабалар ва мактаб ўқувчилари орасида хитой тилига бўлган талаб сезиларли даражада ошгани, уларнинг Хитойда ўқишга бўлган қизиқиши, шунингдек, Хитой маданияти ва маҳсулотлари оммалашиб бораётгани қайд этилган.

“Яқингача ҳамма нарса Ғарбча бўлиб келган мамлакатда ҳайратланарли нарса юз берди: Хитой руслар учун орзу қилинадиган ва модага айланди”, деб ёзади Америка газетаси.

Қайд этилишича, сўнгги уч йилда Россия Федерациясининг Украинага қарши кенг кўламли уруши ва Пекин билан сиёсий яқинлашуви фонида Хитойга қизиқишнинг кескин ортиши кузатилган.

Маълумот учун, аввалроқ Россия Президенти Владимир Путин ҳам набираси хитой тилини билишини эслатиб ўтганди.

“Яқин одамларим, қариндошларим хитой тилини ўрганишаётганини айтганимда, набирам ҳақида гапирган эдим. Унинг ўқитувчиси Пекинлик, у билан хитойча бемалол гаплашадиган”, деганди Путин.