Алишер Қодиов Қашқадарёда қандай масалаларни кўтарди?

“Миллий тикланиш” демократик партиясидан Президентликка номзод Алишер Қодировнинг сайловчилар билан учрашувлари давом этмоқда. Номзод кеча 29 сентябрь куни Қашқадарё вилоятига етиб келди ва сайловолди учрашувини Саидо Насафий номидаги вилоят ахборот-кутубхона маркази фаолияти билан танишувдан бошлади.

1943-йилда шаҳар кутубхонаси сифатида фаолиятини бошлаган марказ бугун 300 мингга яқин китоб фондига эга. Кутубхонада жорий йилда 3 млрд сўмлик қурилиш-таъмирлаш ишлари амалга оширилиб, шарт-шароитлар янада яхшиланди.

Шундан сўнг, Қашқадарёлик сайловчилар билан учрашув бошланди. Қарши шаҳрида ўттган учрашувни ишончли вакил Сайфулла Махматмўминов очиб, номзоднинг таржимаи ҳоли билан таништирди. Қодиров Қашқадарё ҳақида гапирар экан, бу юрт Насафийлар, Кешийлар юрти эканини, Амир Темурни аллалаган, Абдулла Ориповга қалам тутқазган Ватан эканини таъкидлади.

– Шу боис, ҳар доим Қашқадарёга келган одамни ҳаяжон босади. Сўнгги беш йилда мамлакатимизда амалга оширилаётган ислоҳотлар натижаларини Қашқадарёда, вилоят халқи кундалик ҳаётида кўриш мумкин,  – деди номзод.

Қашқадарё учрашувида ҳам асосий эътибор тарбия ва таълим тизимини ислоҳ қилиш, ўқитувчиларга қулай шарт-шароитлар яратиш, замонавий ўқув қўлланмалари тайёрлаш, энг асосийси, педагогикани ўз ҳаётининг мазмуни деб билган мутахассисларни тайёрлаш масалаларига қаратилди.

Алишер Қодиров:

– Мактабларда ҳам ҳунар ўргатишга катта эътибор қаратиш керак. Ҳатто олий маълумотли инсоннинг ҳам қўлида албатта ҳунари бўлиши лозим. Ёшларда бой бўлишнинг ягона йўли олий маълумот олиш деган тушунча бор. Бу нотўғри қарашдир. Мактабларда 7-синфдан кейин болаларнинг қизиқишига қараб гуруҳларни шакллантириш лозим. Улар орасида эртанги кунимизнинг тадбиркорлари, ҳунармандлари, илмга иқтидорлари бор . Давлатни ана шундай инсонлар бойитади. Фақат уларни тўғри тарбиялаб, тўғри йўлга солсаккина мақсадга эришамиз.

Бундан ташқари Алишер Қодиров “Гендер тенглиги” масаласига алоҳида тўхталиб, жумладан шундай деди:

– Аёлларнинг аввало она эканини эсдан чиқармаслигимиз лозим. Уларга оилада ҳам, жамиятда ҳам муносиб шароит яратиб беришимиз керак. Бу билан оғриқли жиҳат –оилаларнинг ажралиб кетиши олдини ҳам олган бўламиз. ХДПдан кўрсатилган номзод гендер тенглиги орқали аёлларни ҳурмат қилишга чақиряпти. Лекин биз азалдан оналар, қизларимиз, аёлларимизнинг ҳурматини жойига қўйиб келган халқмиз. Бу биз учун аллақачон миллий қадриятимизга айланиб бўлган.

Президентликка номзод ўқитувчиларга зарур шароитлар яратиш масаласига ҳам эътибор қаритилиши кераклигини айтди:

– Ўқитувчини бой қилишимиз керак. Маошидан машина минсин, таътилини хорижда ўтказсин. Аммо савиясиз ўқитувчилар бу сафда бўлмаслиги керак. Шу маънода, биз тарбиячилар, педагогларнинг янги авлодини шакллантиришимиз лозим!, – деди  “Миллий тикланиш” номзоди.