Хитойда порахўр мансабдор ўлимга ҳукм қилинди

Хитой судида порахўрлик жинояти учун мансабдор шахс ўлим жазосига ҳукм қилинди, бироқ ҳукм ижроси икки йилга кечиктирилди. Айбланувчи ноқонуний тарзда 15 миллион доллардан ортиқ маблағ олган. Бу ҳақда Хитой Марказий телевидениеси хабар берди.

Телеканалга кўра, Хитой Халқ сиёсий маслаҳат кенгаши Хунань провинцияси қўмитаси раисининг собиқ ўринбосари Дай Даоцзин порахўрликда айбдор деб топилиб, Гуандун провинциясининг Чжухай шаҳридаги халқ суди томонидан ўлим жазосига ҳукм қилинган.

Суд ҳукмига кўра, Дай Даоцзин порахўрлик учун ўлим жазосига ҳукм қилинган, аммо бу ҳукм ижроси икки йилга кечиктирилди. Шунингдек, у бутун умр сиёсий ҳуқуқлардан маҳрум этилиб, унинг барча шахсий мулки мусодара қилинган. 

Маълум бўлишича, Дай Даоцзин турли лавозимларда ишлаган пайтида хизмат мавқеидан шахсий манфаатлари йўлида фойдаланган. Хусусан, у бевосита ёки ўз қариндошлари орқали жами 107 миллион юандан (тахминан 14,9 миллион доллар) ортиқ молиявий ва моддий бойликларни ноқонуний равишда қабул қилган. 

У истеъфога чиққандан кейин ҳам эски алоқаларидан фойдаланиб, яна 3,66 миллион юань (510 минг доллар атрофида) қийматидаги бойликларни ноқонуний олган.

Маълумот учун, Хитойда порахўрлик учун ўлим жазосини икки йилга кечиктириш билан чиқарилиши одатий ҳол. Бундай ҳолларда, агар икки йил ўтганидан сўнг, судланувчи яхши хулқ кўрсатса, ўлим жазоси умрбод қамоққа алмаштирилади, лекин енгиллик берилмайди ва муддатидан илгари озод этилмайди.