Сулҳ узоққа чўзилмади. Кац Эронга зарба беришни буюрди

Исроил Мудофаа вазири Исроил Кац ўз ҳарбийларига Теҳрон марказидаги объектларга кучли зарбалар беришни топширди. Бу ҳақда “The Times of Israel” хабар берди.

Вазирга кўра, ушбу зарбалар тинчлик битими тузилганига қарамай, Эроннинг Исроилга қилинган ҳужумига жавоб сифатида йўлланилади. 

“Мен Исроил мудофаа армиясига Эрон томонидан ўт очишни тўхтатиш режими бузилганига жавобан Теҳрон марказидаги нишонларга кучли зарбалар беришни буюрдим”, деган яҳудий давлатининг Мудофаа вазири. 

Нашрнинг қўшимча қилишича, ўт очишни тўхтатиш режими кучга кирганидан сўнг, Эрондан Исроил томон икки баллистик ракета учирилган. Хабарларга кўра, иккала ракета ҳам тутиб қолинган.

Эрон давлат телерадиокомпанияси ўт очишни тўхтатиш эълон қилингандан кейин Эрон ҳудудидан ракета учирилгани ҳақидаги хабарларни рад этди.

Тинчлик режаси 

Бугун, 24 июнь куни Эрон томонидан Исроилга қарши тўртта ҳужум тўлқинидан сўнг ўт очишни тўхтатиш сулҳи кучга кирди. Кейинроқ буни АҚШ Президенти Дональд Трамп тасдиқлади. Қолаверса, Исроил расмийлари ҳам Эрон билан ҳарбий можарода аввалроқ АҚШ Президенти Дональд Трамп томонидан эълон қилинган ўт очишни тўхтатиш келишуви кучга кирганини тасдиқлади. Сулҳга кўра, Исроил ва Эрон 12 соатга тўлиқ ва буткул ўт очишни тўхтатишга рози бўлган. Эрон расман сулҳни бошлаши, 12 соатдан кейин Исроил ўт очишни тўхтатиши ҳамда 24-соатда эса “дунё 12 кунлик урушнинг расман якунланганини кутиб олиши керак эди. Аммо Трамп тузган сценарий изидан чиқиб кетди.