Netflix Амир Темур ҳақида фильм суратга олди

Netflix стриминг платформаси Амир Темурнинг ҳаёти ва ҳокимиятдаги йўлини ҳикоя қилувчи тарихий драма – “Темур: Сўнгги ғолибнинг юксалиши” номли фильмни суратга олиш ишларини тўлиқ якунлади. Бу ҳақда фильмнинг Instagram саҳифасида эълон қилинди.

Қайд этилишича, ушбу асар буюк саркарданинг шонли юксалиш тарихини аниқлик ва ўша давр муҳитига алоҳида эътибор билан намоён этади.

“Биз минтақанинг энг муҳим шахсларидан бири ҳаётини айнан у яшаган ва жанг қилган ерда акс эттирдик. Бу суратга олиш жараёни учун бебаҳо имконият бўлди”, дея изоҳ берган фильм муаллифлари.

Маълумот учун, унинг режиссёри Жейкоб Шварц, сценарий муаллифи эса Мэтью Грин. Амир Темур ролини америкалик актёр Кристиан Мортенсен, Амир Ҳусайнни Маҳеш Жаду, Темурнинг рафиқаси Ўлжой ролини эса Юлдуз Ражабова ижро этган.

Лойиҳага 2022 йил охирида старт берилган. Тасвирга олиш ишлари Ўзбекистон ва Қозоғистонда бўлиб ўтган. Ҳозирда фильм постпродакшн босқичида. Унинг премьераси жорий йил ёзининг охирида бўлиши кутилмоқда.