Биткоин нархи рекорд даражада кўтарилиб кетди

Бугун, 21 май куни эрталаб биткоин нархи 111 минг 886 долларга чиқиб, янги тарихий рекордни ўрнатди. Бу ҳақда “Coin Metrics” маълумотларига таяниб, CNBC хабар берди. 

CoinShares компаниясининг тадқиқотлар бўйича раҳбари Жеймс Баттерфиллнинг айтишича, нархнинг кескин ўсиши бир неча омиллар билан боғлиқ. Хусусан, ижобий палла ва бозор ишончининг ортиши, АҚШда криптони тартибга солиш масалаларидаги ижобий силжишлар, институцион инвесторлар томонидан юқори қизиқиш.

Қайд этилишича, биткоин одатда технологияга йўналтирилган Nasdaq индексига кучли корреляцияга эга. Аммо бу сафар АҚШ фонд бозорлари пасайган пайтда биткоин ўсишда давом этмоқда. Бу эса инвесторларнинг валюталарга ишончсизлик фонида муқобил қиймат сақловчи восита излаётганини кўрсатмоқда.

Баттерфиллнинг айтишича, бу ўсишда Moody’s агентлиги томонидан АҚШ суверен кредит рейтингининг пасайтирилиши ҳам муҳим роль ўйнаган.

Шунингдек, сўнгги кунларда АҚШда крипто бозорига доир бир нечта ижобий янгиликлар пайдо бўлган. Хусусан, GENIUS Act (коинларни тартибга солувчи қонун лойиҳаси) АҚШ Сенатида асосий процедуравий овоз беришдан ўтган. АҚШ Президенти Дональд Трамп ва унинг технология масалалари бўйича маслаҳатчиси Дэвид Сакс крипто соҳасини қўллаб-қувватловчи кун тартибини илгари сурмоқда. JPMorgan банки бош директори Жеймс Даймон аввалги танқидларига қарамай, энди мижозларга биткоин сотиб олишга рухсат берилишини эълон қилди.

Умуман олганда бу ўсиш нафақат техник омиллар, балки макроиқтисодий хавотирлар, сиёсий силжишлар ва йирик молиявий институтлар позицияси билан боғлиқ. Биткоин тобора кўпроқ валютавий беқарорликка қарши хавфсиз актив сифатида кўрилмоқда.