7 ой ичида 25 эркакка турмушга чиққан аёл қўлга олинди

Ҳиндистоннинг Ражастан штати полицияси томонидан 23 ёшли Анурадҳу Пасван исмли аёл турли штатларда атиги 7 ой ичида 25 нафар эркак билан турмуш қуриб, кейин уларни алдаб қочиб кетганликда айбланиб, қўлга олинди. Бу ҳақда “The Economic Times” нашри хабар берди.

Нашрга кўра, аёл Бҳопал шаҳрида ҳибсга олинган. Ҳатто унга “алдаб турмушга чиқиб, қочиб кетадиган келин” номли лақаб ҳам қўйилган.

Маълумотларга кўра, Анурадҳу ўзини келин қилиб кўрсатиб, қонуний равишда эркаклар билан турмуш қурган, кейин эса бир неча кун ичида уларнинг уйидан йўқолиб, ўзи билан бирга тилла, нақд пул ва электрон буюмларни олиб кетган.

Ушбу фирибгарлик ишлари жорий йилнинг 3 май куни Вишну Шарма исмли фуқаронинг шикоят қилганидан сўнг фош бўлган. У воситачилар орқали 2 лакҳ рупий (тахминан 60 млн сўм) тўлаб, ўзига турмуш ўртоқ топишни сўраган. Анурадҳу жорий йилнинг 20 апрель куни у билан маҳаллий судда никоҳдан ўтган, аммо 2 май куни уйдан қимматбаҳо буюмлари билан қочиб кетган.

Дастлабки тергов маълумотларига кўра, Анурадҳу ўз фирибгарлик усулини мукаммал даражада ишлаб чиққан. У илгари Уттар-Прадеш штатининг Маҳаражганж шаҳрида шифохонада ишлаган ва оилавий жанжалдан сўнг биринчи эридан ажрашган. Кейинчалик Бҳопалга кўчиб ўтган ва у ерда никоҳ фирибгарлиги билан шуғулланадиган жиноятчи гуруҳга қўшилган.

Бу гуруҳ турли платформалар орқали турмушга чиқмоқчи бўлган “келинлар”ни кўрсатиб, эркаклардан 2 дан 5 лакҳ рупийгача ҳақ олган воситачилар ёрдамида ишлаган.

Анурадҳу Шарма уйидан қочгач, Бҳопалда Габбар исмли бошқа эркак билан яна турмуш қуриб, уни ҳам 2 лакҳ рупийга алдаган. Полиция унинг қўлга тушиши учун махсус режа тузган ва бир ходимни сохта куйов сифатида юборган. Агентлардан бири Анурадҳунинг суратини юборганида, полиция бу имкониятдан фойдаланиб, уни қўлга олган.

Ҳозирда полиция жиноятга алоқадор бўлган бошқа шахсларни ҳам аниқлаган.