Namanganda sement zavodi qurilishi boshlandi

Namangan viloyatida O‘zbekiston-Xitoy “Namangan Jinmingyang building materials” yirik sement zavod qurilishi boshlandi. Yangi zavodda yiliga 1,5 million tonna sement ishlab chiqarish rejalashtirilgan. Zavodning qurilishiga Xitoy tomoni 90 mln dollar kiritadi.

Namangan viloyatining Yangiqo‘rg‘on tumanida O‘zbekiston-Xitoy “Namangan Jinmingyang building materials” zavodi qurilishi boshlandi. Bu haqda Namangan viloyat hokimligi matbuot xizmati xabar qildi.

Zavod loyihasi 105 million dollarni tashkil qiladi. Bu zavod keyingi yilning to‘rtinchi choragida ishga tushirish rejalashtirilgan.

Zavod uchun 40 gektar maydon ajratilgan

Yangi zavodda yiliga 1,5 million tonna sement ishlab chiqarish ko‘zlangan.

“Namangan Jinmingyang building materials” 40 gektar maydonda barpo etiladi. Bu zavod “Bunyodkor Maxsudbek Fayz” va Xitoyning “Hebei Yijia Cheng Trading Co. LTD” kompaniyasi tomonidan tashkil qilinadi. Xitoyliklar bu loyihaga 90 million dollar, qolgan qismini esa O‘zbekiston tomoni kiritadi.

Ko‘pgina ish o‘rni yaratiladi

Zavodda zamonaviy asbob-uskunalar o‘rnatiladi. Loyiha amalga oshirilishi natijasida 700  dan ortiq ish o‘rinlar yaratiladi.