Таиландда россиялик опа-укалар ваҳшийларча ўлдирилди

Таиландда россиялик 22 ёшли Диана Назимова ҳамда унинг 17 ёшли укаси Роман Назимов ўлдириб кетилди. Қотилликда гумон қилинаётган икки шахс қўлга олинди. Бу ҳақда “Khaosod” хабар берди.

Маълум қилинишича, Диана ва Роман жорий йилнинг 26 июль куни тонг соат тахминан 04:00 да Паттайя яқинидаги Хуай Яй ҳудудидаги уйидан Honda русумли мотоциклда яқин атрофдаги дўконга йўл олган. Орадан кўп ўтмай улар билан алоқа узилган. Бедарак йўқолишидан аввал Диана онасига “Шошилинч” деган хабар юбориб, кимдир уларни кузатаётганини ёзган. Шунингдек, унинг телефонига яқин атрофда номаълум Bluetooth-трекер аниқлангани ҳақида огоҳлантириш келган. Шундан сўнг опа-уканинг телефонлари ўчиб қолган.

Онаси уларнинг қайтиб келмаганидан сўнг полицияга мурожаат қилган. Қидирув ишларига полиция, маҳаллий аҳоли ва хизмат итлари билан кинологлар жалб этилган. Кузатув камераларида россияликлар ортидан яна бир мотоцикл ҳаракатлангани аниқланган. Кейинчалик уларга тегишли Honda мотоциклининг айрим қисмлари Чонбури провинциясининг Бангламунг туманидаги Тхунг Луанг эски қабристони ҳудудидан кўмилган ҳолда топилган.

Тергов давомида 43 ёшли Тана (“Понг” лақабли) ва 39 ёшли Тонгчай (“Тхонг” лақабли) асосий гумонланувчи сифатида аниқланган. Улар кеча, 31 июль куни Са Каео провинциясининг Ванг Сомбун туманида қочишга уринган вақтида қўлга олинган.

Сўроқ давомида гумонланувчилар россияликларнинг мотоциклини ўғирламоқчи бўлганини тан олган. Уларнинг айтишича, Диана ва Роман қаршилик кўрсатганидан сўнг, Роман отиб ўлдирилган, Диана эса калтакланиши оқибатида ҳалок бўлган.

Шундан сўнг, гумонланувчилар жиноят изларини яшириш мақсадида марҳумларнинг жасадларини Чонбури провинциясидаги Кхао Чи Чан ҳудудига кўмган. Мотоцикл эса қисмларга ажратилиб, алоҳида кўмилган.Маълум қилинишича, полиция гумонланувчиларни жасадлар яширилган жойга олиб бориб, тергов ҳаракатларини давом эттирмоқда.

Шунингдек, Паттайя суди аввалроқ Понг ва Тхонгни тунги ўғирлик ҳамда ўғирланган мулкни яширишда гумон қилиб, уларни ҳибсга олишга ордер берган. Бундан ташқари, Хой ва Пханг исмли яна икки шахс мотоцикл қисмларини кўмиш ва гумонланувчиларнинг қочишига ёрдам берган бўлиши мумкинлиги юзасидан сўроқ қилинмоқда. Улар эса айбловларни рад этиб, Понг ва Тхонгни танимасликларини билдирган.