Туннель қулаши оқибатида 12 ишчи ҳалок бўлди

Ҳиндистоннинг шимоли-шарқидаги Сикким штатида қурилаётган туннелда газ портлаб, унинг бир қисми қулади. Ҳодиса оқибатида камида 12 ишчи ҳалок бўлди. Бу ҳақда BBC хабар берди.

Қайд этилишича, воқеа жорий йилнинг 20 июль куни содир бўлган. Айни пайтда туннель ичида қолиб кетган яна 13 нафар ишчини қидириш-қутқариш ишлари давом эттирилмоқда.

Маълумотларга кўра, портлаш туннелнинг тахминан 1,5 километр ичкарисида содир бўлган. Қурилаётган ушбу туннель Теста дарёсидан гидроэлектростанция турбиналарига сув етказиб бериш учун мўлжалланган бўлиб, у давлатга қарашли Миллий гидроэлектростанциялар корпорацияси томонидан амалга оширилаётган йирик лойиҳа таркибига киради.

Ҳодиса тоғ жинслари орасида тўпланиб қолган метан газининг тўсатдан портлаши оқибатида юз берган. Портлаш натижасида зич тутун ва заҳарли газлар тарқалган.

Сикким ҳукумати ҳам авария метан газининг ёниши сабабли содир бўлганини маълум қилган.

Қайд этилишича, ҳодиса вақтида туннелнинг турли қисмларида жами 27 нафар ишчи бўлган. Улардан икки нафари ташқарига чиқишга улгурган, қолган 25 киши эса ичкарида қолиб кетган.

Полиция бошлиғи Сонам Д. Бхутианинг айтишича, ҳозиргача 12 нафар ишчининг жасади топилган. Қутқарувчилар яна 13 кишини излаш ишларини давом эттирмоқда.

Ҳуқуқ-тартибот идоралари етти нафар марҳумнинг шахсини аниқлаган. Уларнинг бири Сикким штатидан, қолганлари эса Ғарбий Бенгалия, Уттаракханд ва Ассам штатларидан бўлган мигрант ишчилар экани айтилмоқда.

Расмийларнинг таъкидлашича, ҳалок бўлганларнинг ўлим сабаби суд-тиббий экспертизадан сўнг аниқланади.

Ҳиндистон Миллий табиий офатларга жавоб бериш кучлари вакиллари қутқарув ишлари ишчилар бўлиши мумкин бўлган 200 метрлик ҳудудда олиб борилаётганини билдирган.

Сикким штати бош вазири Прем Сингх Таманг ҳодиса сабабларини ўрганиш учун махсус тергов гуруҳи тузилганини маълум қилди.

“Воқеа қандай содир бўлганини аниқлаш учун мутахассислар гуруҳи жалб қилинди. Текширув натижаларига кўра тегишли чоралар кўрилади”, деди Таманг.