Сохта mygov.uz платформаси орқали фуқароларнинг банк карталаридаги пулларни ўзлаштириб келган кибержиноятчилар гуруҳи фош этилди. Бу ҳақда Ички ишлар вазирлиги хабар берди.
Маълум қилинишича, 1993 йилда Хоразм вилоятида туғилган шахс давлатнинг расмий mygov.uz платформасига ўхшаш сохта сайт яратиб, Instagram ижтимоий тармоғи орқали уни “компенсация расмийлаштириш маркази” сифатида реклама қилган. Фуқаролар сохта ҳавола орқали сайтга кириб, анкета тўлдирган ва банк картаси маълумотларини киритган. Шундан сўнг уларнинг ҳисобидаги пуллар ўғирланган.
Қайд этилишича, гумонланувчи жиноий фаолиятига 2002 ва 2006 йилларда туғилган яна икки нафар шахсни ҳам жалб қилган. Улар 26 нафар фуқаро номига расмийлаштирилган 293 та “дроп” банк картасидан фойдаланган. Ўзлаштирилган маблағлар мазкур карталарга ўтказилиб, кейинчалик Telegram’даги махсус крипто-ботлар орқали крипто-активларга айлантирилган.
Билдирилишича, жиноий гуруҳ республика бўйлаб 456 нафар фуқародан 1 миллиард сўмдан ортиқ маблағни ўзлаштирган. Мазкур ҳолат Андижон вилояти ИИБ Кибержиноятларга қарши курашиш бошқармаси ходимлари томонидан ўтказилган тезкор тадбирлар давомида аниқланган.
Ҳозирда гумонланувчиларга нисбатан Жиноят кодексининг 168-моддаси (фирибгарлик) ва 278-6-моддаси (зарар келтирувчи дастурларни яратиш, ишлатиш ёки тарқатиш) билан жиноят иши қўзғатилиб, тергов ҳаракатлари олиб борилмоқда.
Тасодифий хабарлар
Ўзбекистон Осиё кубогининг плей-офф босқичига йўл олди
«Самолётни қайтаришимни талаб қилишди». Шавкат Мирзиёев Суриядаги ўзбекистонликларни олиб келиш машаққатлари ҳақида гапирди
Инспекторлар боди-камерадан нима мақсадда фойдаланишади?
Коррупция – тараққиёт кушандаси
Дунё учинчи жаҳон урушига жуда яқин турибди