“Супер олтин тўп” қачон топширилиши айтилди

“France Football” таҳририяти ноёб мукофот “Супер олтин тўп”ни қайта тиклаш масаласини муҳокама қилмоқда. Бу ҳақда “The Touchline” портали хабар берди.

Маълумотларга кўра, мукофотни биринчи марта топширилганидан роппа-роса 40 йил ўтиб, яъни 2029 йилда яна тақдим этиш режалаштирилмоқда.

Кутилишича, соврин сўнги 30 йилнинг энг яхши футболчисига топширилади. 1980 йиллар охирида бўлгани каби номзодлар “Олтин тўп” мукофотини бир неча бор қўлга киритган футболчилар орасидан танлаб олинади.

Тарихда ягона “Супер олтин тўп” 1989 йилда Альфредо Ди Стефанога топширилган. Ўша пайтда “Реал Мадрид” афсонаси овоз беришда Йохан Кройф ва Мишель Платинини ортда қолдирган эди.

2021 йилгача ноёб соврин “Сантьяго Бернабеу” стадионидаги клуб музейида сақланган. Кейинчалик у кимошди савдосига қўйилиб, 187 минг фунт стерлингга сотилган.

Агар мукофот 2029 йилда яна тақдим этилса, футбол жамоатчилиги сўнги ўттиз йилликнинг энг буюк футболчисини аниқлаш учун яна бир бор турли авлод юлдузларини таққослаш имкониятига эга бўлади.