Россиянинг Украинадаги йўқотишлари сони 160 мингдан ошди

Украинага қарши олиб борилаётган кенг кўламли урушда Россия армиясининг тасдиқланган йўқотишлари 160 минг кишидан ошди. Бу ҳақда “Медиазона” хабар берди.

Бугун, 16 январь ҳолатига кўра, “Медиазона” очиқ манбалари асосида босқин бошланганидан буён ҳалок бўлган 163 606 нафар россиялик ҳарбийнинг исмини аниқлаган. Бироқ бу рўйхат тўлиқ эмас, чунки ҳалок бўлган ҳарбийларнинг барчаси ҳақидаги маълумотлар оммага ошкор бўлавермайди. 

Халқаро ташкилотлар ва разведка тузилмаларининг Россиянинг умумий йўқотишлари (ўлдирилганлар ва яраланганлар) бўйича баҳолари анча юқори. 2025 йил декабрида НАТОдаги юқори лавозимли мансабдор шахс Россия армиясидаги ўлдирилган ва яраланганлар сони 1,15 миллион кишига яқинлашиши мумкинлигини айтган. Унинг сўзларига кўра, ноябрь ойида Россиянинг ўртача суткалик йўқотишлари тахминан 1100 кишини ташкил этган.

Жорий йил 13 январь куни НАТО Бош котиби Марк Рютте Россия Украинада ойига 20-25 минг нафар ҳарбийни йўқотаётганини, яъни ўлдирилаётганини маълум қилган. У бу кўрсаткич 10 йил давом этган Афғонистон урушида ҳалок бўлган қарийб 20 минг нафар совет аскарининг умумий сонидан ҳам ошиб кетишини қайд этган. Рюттенинг сўзларидан келиб чиқиб, фақат 2025 йилнинг ўзида Россиянинг ўлдирилган ҳарбийлари сони 300 минг кишигача етган бўлиши мумкин.

2025 йил июнь ойида Британия разведкаси Россиянинг умумий йўқотишларини тахминан бир миллион киши деб баҳолаган. Ўтган йил август ойида АҚШ Президенти Дональд Трамп 2025 йил бошидан буён Россия 112 мингдан ортиқ аскарини йўқотганини айтган. “The Economist” журнали декабрь ойидаги таҳлилида уруш давомида Россиянинг жами йўқотишлари 900 мингдан 1,35 миллион кишигача етган, бу эса урушгача бўлган эркак аҳолининг қарийб 1 фоизига тенг деган хулосага келган.