Shavkat Mirziyoyevning 2020-yil fevralida Rossiyaga tashrif buyurishi rejalashtirilmoqda

O‘zbekiston Prezidenti Shavkat Mirziyoyevning 2020-yil fevral oyida Rossiyaga tashrif buyurishi rejalashtirilmoqda. Bu haqda 1-oktabr, seshanba kuni Toshkentda bo‘lib o‘tgan O‘zbekiston—Rossiya ishbilarmonlik kengashining to‘rtinchi majlisida Oliy Majlis Senati raisining birinchi o‘rinbosari Sodiq Safoyev ma’lum qildi, deb xabar bermoqda “Gazeta.uz”.

“Aminmanki, Shavkat Mirziyoyevning kelgusi yil boshida — fevralda Moskvaga amalga oshirilishi rejalashtirilayotgan tashrifi aloqalarimizni mustahkamlashda yana bir qadam bo‘ladi”, — deb ta’kidlagan Sodiq Safoyev.

Sodiq Safoyevning ma’lum qilishicha, 2019-yilning yanvar—sentabr oylarida ikki davlat o‘rtasidagi o‘zaro savdo aylanmasi o‘tgan yilning xuddi davriga nisbatan 10 foizga o‘sib, 4 milliard dollardan oshdi. Rossiya kompaniyalarining O‘zbekiston iqtisodiyotiga kiritgan sarmoyalari hajmi 9 milliard dollardan ziyodroqni tashkil etgan.

Tomonlar O‘zbekistondan Rossiyaga meva-sabzavotlar yetkazib berish hajmini oshirish bo‘yicha tadbirlar rejasini imzoladi.